Jedelsatyny tepken astanalyq turǵyn ustaldy

ASTANA. KAZINFORM – Elordalyq polıtseıler turǵyn úı keshenderiniń birinde lıftiniń tablosyn teýip syndyrǵan qala turǵynyna qatysty sotqa deıingi tergeýdi bastady. 

Astana qalasynyń ákimdigi taratqan aqparatqa súıensek, oqıǵa turǵyn úı kesheniniń kireberisinde bolǵan. Belgisiz er adamnyń áreketinen keıin jedelsaty isten shyqqan.

Jedel-izdestirý is-sharalaryn júrgizý nátıjesinde buzaqynyń jeke basy anyqtaldy. 27 jastaǵy azamat masań kúıinde lıftiniń tablosyn tepken. Onyń bul áreketi beınebaqylaý kamerasyna túsip qalǵan. 

Qazirgi kezde «Buzaqylyq» baby boıynsha sotqa deıingi tergeý júrip jatyr. Qala turǵyny turǵyn úı keshenindegi lıft qabyrǵasyna zaqym keltirgeni úshin aıypty dep tanyldy.

Astana qalasy Polıtsııa departamenti azamattarǵa bótenniń múlkine zııan keltirgeni úshin qoldanystaǵy zańnamaǵa sáıkes jaýapkershilik kózdelgenin eskertedi.