Jedel jospar iske qosyldy - Energetıka mınıstrligi KQK-daǵy tótenshe jaǵdaıǵa qatysty

ASTANA. KAZINFORM – QR Energetıka mınıstrligi Reseıdiń Novorossıısk portyndaǵy tótenshe jaǵdaıǵa baılanysty resmı aqparat taratty.

2025 jylǵy 29 qarasha kúni Astana ýaqytymen saǵat 06:06-da Kaspıı qubyr konsortsıýmynyń (KQK) Novorossıısk mańyndaǵy teńiz ınfraqurylymyna ushqyshsyz sý kólikterimen shabýyl jasalǵan. Shabýyl saldarynan ekinshi syrtqy aılaq qurylǵysy (VPÝ-2) aıtarlyqtaı zaqymdanǵan. Qondyrǵy tolyq jóndeý jáne qalpyna keltirý jumystary júrgizilgenge deıin paıdalanýdan shyǵarylǵan.

Energetıka mınıstrligi bul oqıǵaǵa erekshe alańdaýshylyq bildirip, azamattyq ınfraqurylym nysandaryna baǵyttalǵan mundaı áreketterge jol berilmeýi tıis ekenin atap ótti.

«KQK júıesi – halyqaralyq energetıkalyq joba. Onyń nysandaryna jasalǵan kez kelgen kúsh qoldaný jahandyq energetıkalyq qaýipsizdikke tikeleı qaýip tóndiredi jáne konsortsıýmǵa qatysýshy memleketterdiń, sonyń ishinde Qazaqstan Respýblıkasynyń ekonomıkalyq múddelerine aıtarlyqtaı zııan keltiredi», – delingen resmı túsiniktemede.

Mınıstrliktiń habarlaýynsha, yqtımal teris saldardy azaıtý jáne iri munaı ken oryndaryndaǵy óndiris deńgeıin saqtaý maqsatynda eksporttyq kólemderdi balama baǵyttarǵa qaıta jóneltý jónindegi jedel jospar iske qosylǵan.

Jaǵdaı Qazaqstan Úkimetiniń erekshe baqylaýynda.

Aıta keteıik, buǵan deıin KQK taǵy shabýylǵa ushyrap, júk tıeý-qabyldaý qurylǵysy zaqymdanǵany habarlandy.