Jedel járdemniń naýqasqa jetetin ýaqytyna qatysty erejeni qaıta qaraý kerek - depýtat

ASTANA. KAZINFORM – Búgin Májilistiń jalpy otyrysynda depýtat Danabek Isabekov jedel járdemniń naýqasqa jetetin ýaqytyna qatysty erejeni qaıta qaraýdy surady.

«Prezıdent Qasym-Jomart Toqaev bıylǵy Joldaýynda densaýlyq saqtaý salasyna toqtalyp, otandyq medıtsınany jetildirýde jekemenshik sektordy tartýdy tapsyrdy. Mundaı júıeli jumystardy jedel járdem qyzmetinde de qoldaný kerek dep sanaımyz. Ol úshin elimizdegi jedel medıtsınalyq kómek kórsetý erejesin qaıta qaraý óte mańyzdy. Erejeniń 2-taraýynyń 11-tarmaǵynda dárigerlik brıgadanyń dıspetcherden patsıentke deıin jetý ýaqyty aıqyn belgilengen. Degenmen, iri qalalardan bastap, kentter men aýyldarǵa deıin normamen belgilenbegen ýaqytta jedel járdem qyzmeti jetpeıtinin jıi estımiz. Mundaı jaǵdaı jaqynda bizdiń áýletimizge de boldy. Naqtyraq aıtqanda, 23 shildede ákem kenetten aýyryp, jedel járdem qyzmetine saǵat 13:50-de shaqyrtý berildi. Alaıda jádel járdem 30 mınýttan astam ýaqatta keldi. Bul aralyqta ákemniń jaǵdaıy óte aýyrlap qaldy. Shymkent qalasy «Jedel medıtsınalyq járdem kórsetý stantsııasy» ereje boıynsha patsıettiń jaǵdaıy 2-shi jedeldik sanatta bolǵandyqtan, 15 mınýtta jetýi tıis edi. Biraq keshikkennen keıin, tıisti járdemin kórsete almaı, ákemizden aıyrylyp qaldyq», - dedi D.Isabekov Densaýlyq saqtaý mınıstri Aqmaral Álnazarovanyń atyna joldaǵan saýalynda.

Onyń aıtýynsha, mundaı jaǵdaılar elimizde jıi kezdesedi. Jedel járdem óz ýaqytynda keletin bolsa, kóp adamnyń ómirin saqtap qalýǵa múmkindik bolar edi.

«Erejeniń osy normalary kóp jaǵdaıda saqtala bermeıdi. Keıde jedel járdem 1 saǵattan asa ýaqytta jetedi. Muny qalaı jedel járdem dep ataýǵa bolady? Máselen, AQSh, Kanada, Jańa Zelandııa, Aýstrııa, Irlandııada jedel járdem qyzmetiniń basty ereksheligi – olar óte shuǵyl, shuǵyl dep ekige bólinip, naýqastarǵa qyzmet kórsetedi. Osy tájirıbeni bizge de engizý qajet dep bilemin», - dedi depýtat.

Bul rette ol Densaýlyq saqtaý mınıstrligine myna sharalardy qolǵa alýdy usyndy. Birinshiden, jedel járdemniń patsıentke jetetin ýaqytyn qaıta qarap, álem elderiniń tájirıbesin zertteý qajet. Ekinshiden, jedel járdem salasyna jekemenshik sektordy engizip, básekelestikti arttyryp, servıstik qyzmet salasyn jetildirgen jón. 

Munymen qosa depýtat barlyq jedel járdem brıgadalarynyń jumysyn tekserýdi surady.