Jedel járdemniń qaıda kele jatqanyn endi telefonnan baqylaýǵa bolady
ASTANA. KAZINFORM – Qazaqstanda jedel járdem brıgadasynyń qozǵalysyn telefon arqyly baqylaý júıesi synaqtan ótip jatyr. Joba ázirge Shymkent qalasy men Aqtóbe oblysynda iske qosylǵan. Sonymen qatar 13 qazannan bastap jedel medıtsınalyq kómek kórsetý qaǵıdalaryna engizilgen ózgerister kúshine enedi.
Jedel járdem shaqyrǵan adam brıgadanyń qaıda kele jatqanyn bilý úshin dıspetcherge qaıta-qaıta habarlasýǵa májbúr bolatyn jaǵdaılar kezdesedi. Endi bul máseleni tehnologııa arqyly sheshý kózdelgen. Jańa júıe boıynsha shaqyrtý qabyldanǵan soń azamattyń telefonyna SMS habarlama jiberilip, onda ıAndeks kartasyna silteme beriledi. Sol arqyly naýqas nemese naqastyń jaqyndary brıgadanyń qozǵalysyn baqylaı alady.
Densaýlyq saqtaý mınıstrligine qarasty Ulttyq shuǵyl medıtsınany úılestirý ortalyǵy basqarma tóraǵasynyń orynbasary Ashat Ishanǵalıulynyń aıtýynsha, joba ázirge synaq rejıminde jumys istep tur.
– Bul bastama alǵash ret engizilip otyrǵandyqtan, ony bir qala men bir oblysta synap jatyrmyz. Eger júıe tıimdiligin kórsetip, jumysymyzǵa oń áserin tıgizse, basqa óńirlerge de engizý máselesi qaralady. Ol úshin qarjylandyrý jaǵy da sheshilip, tıisti qarajat kelesi jylǵy bıýdjetke engizilýi kerek, – dedi ol Jibek Joly telearnasynyń «Búgin.LIVE» baǵdarlamasynda.
Jedel járdem shaqyrtýǵa qansha ýaqytta jetýi kerek?
Jedel medıtsınalyq kómekke túsken ótinishter shuǵyldyq deńgeıine qaraı tórt sanatqa bólinedi. Ár sanatqa brıgadanyń jetý merzimi belgilengen.
Birinshi sanattaǵy shaqyrtýǵa brıgada 10 mınýt ishinde jetýi kerek. Ekinshi sanatqa 15 mınýt, úshinshi sanatqa 30 mınýt, tórtinshi sanatqa 60 mınýtqa deıin ýaqyt beriledi.
Alaıda belgilengen merzimde jetýge jol jaǵdaıy, aýa raıy jáne shaqyrtýdyń kúrt kóbeıýi áser etýi múmkin. Ásirese iri qalalarda qarbalas ýaqytta, al kúz ben kóktemde tumaý órshigen kezeńde júkteme artady.
Ashat Ishanǵalıulynyń sózinshe, jedel járdem stantsııalary suranys kóbeıgen kezde qosymsha brıgadalar shyǵarady. Soǵan qaramastan, keı ýaqytta barlyq shaqyrtýǵa jedel jetý qıynǵa soǵady.
– Jylyna segiz mıllıonnan astam qońyraý túsedi. Qazaqstan boıynsha táýligine 1 600-den astam mobıldi brıgada jumysqa shyǵady. Ásirese tumaý órshigen kezde shaqyrtý sany eki-úsh ese kóbeıip ketýi múmkin. Mundaıda qosymsha brıgadalar jumyldyrylady, – dedi ol.
Qandaı jaǵdaıda mobıldi brıgada jiberiledi?
Shaqyrtý sanaty naýqastyń jaǵdaıyna qaraı anyqtalady. Ómirine tikeleı qaýip tóngen jaǵdaıda reanımatsııalyq brıgada jiberiledi. Onyń quramynda shuǵyl kómek kórsetýge qajetti mamandar bolyp, tıisti medıtsınalyq jabdyqtarmen qamtamasyz etiledi.
Al jaǵdaıy salystyrmaly túrde turaqty naýqastarǵa kelgen brıgada alǵashqy medıtsınalyq kómek kórsetip, ári qaraı qaıda júginý keregin anyqtaıdy. Qajet bolǵan jaǵdaıda naýqasty statsıonarǵa jetkizý máselesi sheshiledi. Eger aýrýhanaǵa jatqyzý qajet bolmasa, emhanada ambýlatorııalyq em alý jóninde usynym beriledi.
Jedel járdem kólikteri nege jıi jańartylmaıdy?
Jedel medıtsınalyq kómek qyzmetindegi taǵy bir másele – kólikterdiń tozýy. Bul mashınalar aptasyna jeti kún, táýligine 24 saǵatqa deıin jumys isteıtindikten, ózge qyzmettik kólikterge qaraǵanda jyldam tozady.
Ortalyq ókiliniń aıtýynsha, jedel járdem kólikteri shamamen 6 jyl paıdalanylǵannan keıin aınalymnan shyǵarylady. Olardyń ornyna jańasyn alý jergilikti atqarýshy organdardyń qatysýymen kezeń-kezeńimen júzege asyrylady.
Bıylǵy toǵyz aıda óńirlerge 300-ge jýyq kólik berilgen. Qajettilik ár aımaqta ártúrli bolǵandyqtan, keı óńirlerge ondaǵan kólikten jetkizilgen. Kólik parkin jańartý aldaǵy jyldary da jalǵasady.
Medıtsına qyzmetkerleriniń qaýipsizdigi qalaı qorǵalady?
-Jedel járdem qyzmetkerleri naýqasqa birinshi bolyp jetetin mamandar bolǵandyqtan, keıde ashýly týystardyń qysymyna, balaǵat sózderine nemese shabýylyna tap bolady. Bul máseleni tek oqıǵa bolǵannan keıin jaýapqa tartýmen shekteýge bolmaıdy, - deıdi Ashat Ishanǵalıuly.
Onyń pikirinshe, medıtsına qyzmetkerleriniń quqyqtyq qorǵalýyn kúsheıtip, olarǵa kúsh kórsetý men qysym jasaýǵa jol bermeıtin tetikter qajet.
– Jedel járdem qyzmetkerleri quqyqtyq jaǵynan jetkilikti qorǵalǵan dep aıta almaımyz. Kóbine oqıǵa bolǵannan keıin ǵana sotqa júginý máselesi týyndaıdy. Al mundaı jaǵdaılardyń aldyn alý joldary men mamandardyń mártebesin kúsheıtý mańyzdy. Bul tek jedel járdemge emes, barlyq medıtsına qyzmetkerine qatysty másele, – dedi ol.
Aıta keteıik, buǵan deıin, Almatyda jedel járdem qyzmetkerlerin pyshaqpen qorqytqan eki er adam ustalǵanyn jazǵan edik
