Jedel járdemge kúnim túspesin deseń, úıde otyr: Qazaqstannyń birqatar óńirinde erekshe aktsııa ótti

NUR-SULTAN. QazAqparat – Keshe keshki saǵat 21:00 kezinde Qazaqstannyń birqatar óńirinde jedel járdem kólikteri dabyldy qosyp, ortalyq kóshelermen júrip ótti. «Jedel járdemge kúnim túspesin deseńiz, úıde otyryńyz» degen uranmen ótken aktsııanyń maqsaty – halyqqa karantın talaptaryn saqtaýdyń mańyzyn kórsetý, osylaısha turǵyndardyń jaýapkershiligin arttyrý, dep habarlaıdy QazAqparat.

Atalmysh shara týraly Densaýlyq saqtaý mınıstri Eljan Birtanov Facebook paraqshasynda jazdy.

«Jaraısyńdar, áriptester. Qoldaǵandaryńyz úshin rahmet. Dostar, taǵy bir márte eske sala keteıin – qazir tótenshe jaǵdaı talaptaryn qatań saqtaýdyń mańyzy óte zor. Úıde jáne tabıǵat aıasynda kóp adam shaqyryp, toı jasamańyzdar, saýyq keshin ótkizbeńizder. Bul ásirese óńirlerdegi halyqqa tikeleı qatysty. Nur-Sultan men Almatyda COVID-19 juqtyrǵandar sany áldeqaıda azaıdy, bul karantın talaptaryn saqtaýdyń arqasynda ǵana múmkin bolyp otyr. Alaıda oblystarda naýqastar sany kúnnen kúnge ósip jatyr», - dep jazady mınıstr.

Onyń aıtýynsha, bul – óte jyldam taraıtyn indet.

«Elimizdegi koronavırýsqa shaldyqqandardyń 80 paıyzy – osylaı bireýmen baılanysyp juqtyrǵan. Sondyqtan 2/2/2 erejesin saqtańyzdar, bul degenimiz – taǵy 2 apta úıde otyrý, bir-birimizdiń aramyzda 2 metr qashyqtyq saqtaý jáne eki adamnan artyq jınalmaý», - deıdi Eljan Birtanov.