Jedel járdem júrgizýshisin urǵan Túrkııa azamaty deportatsııalana ma - mınıstr jaýaby
ASTANA. QazAqparat - QR Іshki ister mınıstri Qalmuhanbet Qasymov jedel járdem kóliginiń júrgizýshisin soqqyǵa jyqqan Túrkııa azamatyna qatysty is týraly aıtty, dep habarlaıdy QazAqparat tilshisi.
Úkimet otyrysynan keıingi brıfıng barysynda BAQ ókilderiniń saýalyna jaýap bergen mınıstr Túrkııa azamatynyń jedel járdem kóligi júrgizýshisin soqqyǵa jyǵýyna baılanysty qylmystyq is qozǵalǵanyn aıtty.
«Barlyq mán-jaı belgili. Qazir tergeý amaldary júrgizilip jatyr. Ol aıaqtalysymen isti sotqa beremiz. Sot sheshimi boıynsha qalǵan máselelerdi, onyń ishinde elde qalýy máselesin de sheshemiz. Sot sheshimin kútýimiz qajet. Al ázirshe aldyn ala eshteńe aıta almaımyz», - dedi Qalmuhanbet Qasymov.
Eske sala ketsek, Almatyda jolǵa talasqan azamat jedel járdem júrgizýshisin soqqyǵa jyqty. Sol kúni Almaty polıtsııasy 1990 jyly týǵan Túrkııa azamaty Álı Demırdi, ıaǵnı Folksvagen Passat kóliginiń júrgizýshisin ustady. QR QK-niń 293-baby 1-bóligimen is qozǵaldy.
Birer kúnnen keıin Álı Demır kepilmen bosatyldy.
«Ol Túrkııa azamaty ekenine qaramastan ol Qazaqstan azamatshasyna úılengen. Balasy bar. Turaqty tirkelgen mekenjaıy boıynsha turady. Qylmystyq tergeý oryndarynda onyń buǵan deıin qylmys jasamaǵany anyqtalǵan», - dep atap ótken edi Almaty prokýratýrasynan.
Aıta keteıik, qalalyq ІІD-niń tergeý basqarmasy túrkııalyq azamatty kepilmen bosatý týraly sheshimine qarsy shyqqan bolatyn.
