Jedel járdem júrgizýshisin soqqyǵa jyqqan azamat: Ol birinshi qol kóterdi
ALMATY. QazAqparat - Jedel járdem júrgizýshisin soqqyǵa jyqqan er adam qarsy aryzdanbaǵan, dep habarlaıdy QazAqparat tilshisi.
Bul týraly qalalyq ІІD baspasóz hatshysy Evgenıı Lysenko aıtty.
«Іs materıaldaryna vıdeo engizilgen. Beınekadrda túrik azamatynyń birinshi kep urǵany aıdan anyq kórinip tur. Ony ustaǵan kezde de «jedel járdem júrgizýshisi birinshi qol kóterdi» degen bolatyn. Biraq, vıdeoda bári túsinikti dep oılaımyn. Jedel járdem júrgizýshisine qarsy aryz jazylǵan joq. Tergeý amaldary júrip jatyr. Qalaı tergeý aıaqtalady, is materıaldary sotqa beriledi», - dedi ol.
Eske sala ketsek, keshe Almatyda jolǵa talasqan azamat jedel járdem júrgizýshisin soqqyǵa jyqqan bolatyn. Sol kúni Almaty polıtsııasy 1990 jyly týǵan Túrkııa azamatyn, ıaǵnı Folksvagen Passat kóliginiń júrgizýshisin ustady.
13 jyldan beri jedel járdemde jumys isteıtin Nıkolaı Kýchma ashýshań júrgizýshini jazasyz qaldyrmaýǵa bekinip otyr.
