Jedel járdem júrgizýshisi Túrkııa azamatyn keshirdi
ALMATY. QazAqparat - Almatyda soqqyǵa jyǵylǵan jedel járdem kóligi júrgizýshisiniń oqıǵasy taraptardyń tatýlasýymen aıaqtaldy. Bul týraly áleýmettik jelidegi paraqshasynda jábirlenýshiniń advokaty jazdy, dep habarlaıdy QazAqparat.
Málim bolǵandaı, júrgizýshi Nıkolaı Kýchma men Túrkııa azamaty Demır Ebýzer júzbe-júz bettestirý protsedýrasynan ótti.
«Nıkolaı Grıgorevıch pen Demır Eıýýzer sóılesti. Bul joly da aıyptalýshy shynaıy túrde keshirim surady. Sondaı-aq onyń aqylǵa qonymsyz, agressııalyq jáne zańǵa qaıshy áreketterine ákelip soqtyrǵan jeke basynyń jaǵdaıy túsindirildi. Sottalýshy jasaǵan isine qatty ókinetinin, qyzmettik mindetin oryndap jatqan egde jastaǵy kisige qatysty jasaǵan áreketin keshirilmeıtin jáne laıyqsyz dep sanaıtynyn san ret qaıtalady. Ol sondaı-aq barlyq jedel járdem qyzmetkerlerinen jáne oqıǵaǵa nemquraıly qaramaǵan barlyq qazaqstandyqtardan keshirim surady. Nıkolaı Grıgorevıch onyń keshirimin qabyldady», - delingen quqyq qorǵaýshy Andreı Dıdenkonyń taratqan habarlamasynda.
Nıkolaı Kýchma sondaı-aq sottalýshynyń asyraýynda náreste balasy men zaıyby baryn eskergen.
«Sottalýshy keltirgen moraldyq jáne materıaldyq zalaldy tıisti aqshalaı ótemaqymen ótedi. Taraptar onyń somasyn jarııa etpeýdi surady. Eki jaq tatýlasyp, osyǵan oraı Nıkolaı Kýchma Almaly aýdandyq sotyna, sondaı-aq Almaly aýdany prokýrorynyń atyna ótinish jazdy. Onda sottalýshyny qylmystyq jaýapkershilikten bosatýyn surady. Senimhat berýshiniń múddesi sot aldyndaǵy tergeý aıasynda tıisti túrde usynylǵan, al onyń alǵys sózderi - eń baǵaly syılyq», - dep atap ótti A.Dıdenko.
Budan bólek, ol bul oqıǵadaǵy sońǵy sheshimdi Almaly aýdandyq sotynyń sýdıasy qabyldaıtynyn atap ótti.
Eske salaıyq, Almatyda joldy bólise almaǵan Túrkııa azamaty jedel járdem júrgizýshisi Nıkolaı Kýchmany soqqyǵa jyqqan bolatyn. Kóp uzamaı polıtseıler 1990 jyly týǵan túrkııalyq azamatty anyqtap, ýaqytsha ustaý oqshaýlaǵyshyna jetkizdi. Keıin Álı Demır kepilmen bosatyldy.
