Jedel járdem stansasy Mádına Sádýaqasovaǵa jaýap qaıtardy
ALMATY. QazAqparat - Almaty qalalyq jedel járdem stansasynyń ákimshiligi ánshi Mádına Sádýaqasovanyń synyna qatysty jaýap qaıtardy, dep habarlaıdy QazAqparat.
Instagram áleýmettik jelisindegi jeke akkaýntynda Mádına Sádýaqasova jol talǵamaıtyn kóligine avtobýs kelip soǵylǵany týraly jazǵan. Alaıda bul oqıǵada ánshini ashýlandyrǵan apatqa kináli adam emes. Ol jedel járdemge habarlasyp, avtobýsta zardap shekken jolaýshy áıelge kómek berýdi ótingen. Alaıda jedel járdem dıspetcherleriniń áreketi ánshiniń shamyna tıdi.
«103 nómirine telefon shalsam, tutqany uzaq kótermedi, sosyn jaýap bergen dıspetcher maǵan óte kóp suraq qoıdy. Ol az bolǵandaı, «medıtsınalyq kómek shynymen kerek pe?» dep ózinen suraý úshin zardap shekken áıeldiń nómirin surady. Men zardap shekken áıel týraly jáne apat ornyn habarladym. Menen «Aldyńyzda úsh aıýdy kórip otyrsyz ba?» dep suraǵanda, tipti ashýlandym. Oqıǵa ornyna kelip, Jansaıany alyp ketken jedel járdem qyzmetkerlerine rahmet. Onyń jáne avtobýsta zardap shekken taǵy bir áıeldiń jaǵdaıy jaqsy dep úmittenem», - dep jazdy ánshi.
Almaty qalalyq jedel járdem stansasynyń ákimshiligi jaǵdaıdy túsindirip ótti.
«2018 jyldyń 23 qazanynda jedel medıtsınalyq járdem pýltine saǵat 13:01-de Dostyq dańǵyly men Jambyl kóshesiniń qıylysynda oryn alǵan jol-kólik apaty týraly habar kelip tústi. Brıgada caǵat 13:04-te jiberildi. Brıgada oqıǵa ornyna saǵat 13:13-te, ıaǵnı 9 mınýt ishinde jetken» - dep baıandady Jedel járdem stansasynyń baspasóz qyzmetinen.
Dárigerler sondaı-aq, zardap shekken áıeldiń Almaty kópsalaly kldınıkalyq aýrýhanasyna jetkizilgenin aıtty.
«Oǵan «ıyqtyń soǵylýy, erin men bet jaraqaty» aldyn ala dıagnozy qoıyldy. Jedel járdem brıgadasyn kezdeısoq ótip bara jatqan er adam shaqyrtqanyn, onyń jol apatynyń ornyn kópke deıin túsindire almaǵanyn atap ótý kerek. Olaı bolǵanymen, jedel járdem qyzmetkerleri jyldam jetip, tıisti medıtsınalyq kómekti der kezinde kórsetti», - dep málimdedi uıym.
«103» nómirine habarlasqan adamdarmen sóılesý birden jazylyp, aqparattyq-dıspetcherlik bólim bazasynda saqtalatynyn eske salǵymyz keledi. Atalǵan shaqyrý da bazada tirkelgen» - dedi Jedel járdem ákimshiliginen.
Eske sala keteıik, 23 qazan kúni qazaqstandyq ánshi Mádına Sádýaqasovanyń jaıaý júrginshiler jolaǵynda turǵan kóligine avtobýs soǵylǵan bolatyn.
