«Jedel járdem shaqyrǵan jerge kesh jetedi»: Almaty oblysynyń densaýlyq saqtaý basqarmasy túsinik berdi

QONAEV. KAZINFORM – Almaty oblysynyń densaýlyq saqtaý basqarmasy áleýmettik jelide jedel járdem kólikterin synaǵan vıdeoǵa qatysty pikir bildirdi.

Áleýmettik jelide tarǵan vıdeodan buzylyp, júrmeı turǵan jedel járdem kólikterin kórýge bolady. «Talǵar aýdanynda nege jedel járdem shaqyrǵan jerge kesh jetedi? Óıtkeni 21 kóliktiń tek 5-ýi ǵana qyzmet kórsetedi, basqalary buzylyp tur», - dep jazdy jeli qoldanýshy.

Densaýlyq saqtaý basqarmasynyń málimetinshe, «Oblystyq jedel jáne shuǵyl medıtsınalyq kómek stantsııasy» ShJQ MKK sanıtarlyq avtomashınalaryn jóndeýge ashyq konkýrs tásilimen habarlandyrýdy 20 aqpanda berdi.

«Konkýrs qorytyndysy shyǵarylǵannan keıin habarlandyrý portalda 10 jumys kúni ishinde qaralady. Osy kezeńde qatysýshylardan shaǵym túsip, olardyń arasynda daý týyndady. 23 sáýirde qatysýshylardyń shaǵymdaryn memlekettik aýdıtpen qaraý merzimi aıaqtaldy. Memlekettik aýdıt jaýap bergennen keıin habarlandyrý 5 jumys kúni ishinde memlekettik satyp alýdyń elektrondyq portalyndaǵy sapany baqylaý bóliminde qaralady»,- dep túsindirdi basqarmadan.

Vedomstvodan atap ótkendeı, jedel járdem avtokólikterin jóndeý sharty jetkizýshimen 2 mamyrda jasaldy.

«Búgingi tańda sanıtarlyq avtokólikterdiń 40% - yn jóndeý qajet. Jóndeý jumystary shamamen eki aptada aıaqtalady. Qazirgi ýaqytta 100 jedel medıtsınalyq kómek mashınasy oblys turǵyndarǵa qyzmet kórsetedi»,- dep habarlady densaýlyq saqtaý basqarmasy.

Osy jyldyń tórt aıynda jedel medıtsınalyq járdem stantsııasyna 219013 shaqyrtý tústi.