Jedel járdem naýqasqa dári egýge mindetti me
"23 maýsymda keshki ýaqytta basym aınalyp, jatyp qaldym. Qazaqpyz ǵoı, birden jaý shaptyrmaı, basylyp qalady dep jattym. Sý ishtim. Bolmady. Eki ret qustym. Bolmaǵannan keıin jedel járdem shaqyrdym. Qazir jiberemiz dedi. Bir saǵat ótti. Joldasym da jumystan keldi. Taǵy qońyraý shaldyq. Men ózim aýrýxanaǵa bara almadym. Tursam, basym aınalady. Sodan eki saǵat ótti. Biraq ol ýaqyttyń ishinde jaǵdaıym jaqsardy. Jedel járdem eki jarym saǵattan keıin keldi. Qan qysymyn ólshedi. Dári-dármek salmaısyzdar ma dep suradym. Qazir dári-dármekti salýǵa tyıym salyndy dedi. Sol ras pa?", - dep surady Gúljahan Sálimbaeva.
Mınıstr Eljan Birtanovtyń aıtýynsha, jedel járdem úshin 2,5 saǵat júrý - tym kóp ýaqyt. Sondyqtan atalǵan oqıǵaǵa baılanysty aldymen tekserý sharalary júrgiziledi.
"Al jedel járdemniń ózine kelsek, qazir biz tıisti buıryqty shyǵaryp, jedel kómek kersetiletin jaǵdaılardy tórt satyǵa bóldik. Sozylmaly aýrý bolsa, jergilikti emxana arqyly kómek beriledi. Men jańa statıstıkany da kórsettim. Jalpy, jedel járdemmen jetkizilgen adamdardyń 30 protsenti tumaýmen, taǵy 30 protsenti qan qysymymen jetkiziledi. Sondyqtan bizdiń oıymyz, ondaı brıgadalar tek jedel jaǵdaı bolǵanda ǵana sol naýqasqa baryp, shuǵyl reanımatsııalyq sharalardy jasap, aýrýxanaǵa tezdetip jetkizýi tıis. Jedel járdem mashınasy "dóńgelektegi aýrýxana" emes. Olardyń maqsaty basqa. Sizdiń sozylmaly aýrýyńyz bolsa, aldymen jergilikti emxanadaǵy dárigerińizge xabarlasyp, aqyldasýyńyz kerek. Qazir biz barlyq emxanalarda sondaı jedel járdem kabınetterin ashyp jatyrmyz. Olar táýlik boıy jumys isteıdi. Siz sııaqty sozylmaly aýrýy bar azamattarǵa kómek beredi ", - dep atap kórsetti E.Birtanov.
Onyń sózine qaraǵanda, jedel járdem dári-dármek egýge mindetti emes.
"Olar emdeýge kelmeıdi. Jedel járdemniń negizgi maqsaty - krıtıkalyq jaǵdaıdy toqtatyp, adamdy aýrýxanaǵa tezdetip aparý", - deıdi E.Birtanov.
Aıta keteıik, búgingi kezdesý kezinde mınıstr fast-fýdty shekteýge qatysty pikir bildirdi. Budan bólek, Astanadaǵy perzentxanada analarynan aıyrylǵan eki náresteniń jaǵdaıy týraly aıtyp berdi.