Jedel járdem qyzmetine jylyna 8 mıllıonǵa deıin shaqyrtý túsedi
ALMATY. QazAqparat - QR Jedel medıtsınalyq járdem qyzmetine jyl saıyn 8 mıllıonǵa deıin shaqyrtý túsedi. Bul týraly Óńirlik kommýnıkatsııalar qyzmetiniń baspasóz máslıhatynda QR DSM Ulttyq jedel medıtsınany úılestirý ortalyǵy basqarma tóraǵasynyń orynbasary Ǵumyrbek Aǵybaev málim etti, dep habarlaıdy QazAqparat tilshisi.
Spıkerdiń sózinshe, búgingi tańda respýblıkada jedel medıtsınalyq kómek qyzmeti 18 derbes stantsııa, 130 qalalyq qosalqy stantsııa jáne 284 aýdandyq bólimshelerden turady.
Oblystyq jáne qalalyq JMK stantsııalarynda bir aýysymda 1486 kóshpeli jedel járdem brıgadasy jumys isteıdi, onyń ishinde 290 – mamandandyrylǵan (dárigerlik), 1196 – feldsherlik.
Qalalyq bólimshelerde 911 brıgada, aýdandyq bólimshelerde 576 brıgada jumys isteıdi.
Jyl saıyn QR Jedel medıtsınalyq járdem qyzmeti bizdiń elimizde júrgen qazaqstandyqtarǵa da, shetel azamattaryna da shuǵyl medıtsınalyq kómek kórsetedi.
«Jedel medıtsınalyq kómek jumysynyń ıntegraldyq kórsetkishi shaqyrýǵa der kezinde kelý. Aǵymdaǵy jyldyń 11 aıynda keshigip oryndalǵan shaqyrýlardyń úlesi 4,3% -dy qurady», - dedi Ǵumyrbek Aǵybaev.
Jedel járdem stantsııalary bekitilgen standarttarǵa sáıkes medıtsınalyq jabdyqtarmen jáne medıtsınalyq maqsattaǵy buıymdarmen jabdyqtalǵan, respýblıka boıynsha jaraqtandyrylýy – 97%.
Búgingi kúni JMK balansynda 2 287 birlik sanıtarlyq avtokólik bar, onyń ishinde 1 410 birlik qalada jáne 877 birlik aýylda.
«Bıyl 336 sanıtarlyq kólik satyp alyndy. Barlyq jedel járdem kólikteriniń GPS-navıgatsııasymen jabdyqtalǵan. 2021 jyldyń 11 aıynda respýblıka boıynsha jedel medıtsınalyq kómekke shaqyrýlar sany 7 603 040 boldy. 1 qańtar - 1 jeltoqsan aralyǵynda koronavırýs ınfektsııa boıynsha 354 400 shaqyrýǵa qyzmet kórsetildi, onyń ishinde 259 692 adam aýrýhanaǵa jatqyzyldy»,- deıdi spıker.
Ulttyq shuǵyl medıtsınany úılestirý ortalyǵy jumysynyń taǵy bir baǵyty 2017 jyldan beri oqý-trenıng ótkizedi. Onda medıtsınalyq avıatsııa, jedel jáne shuǵyl medıtsınalyq kómektiń qyzmetkerleri oqytylady.
