Jedel járdem qyzmetin der kezinde paıdalaný úshin ne isteý kerek
NUR-SULTAN. QazAqparat - «Áleýmettik medıtsınalyq saqtandyrý qory» KEAQ-sy resmı saıtynda jedel járdem qyzmetiniń jumys tártibine qatysty ınfografıkasyn jarııa etti.
Atalmysh materıalda elimizdiń medıtsına salasynda jasalyp jatqan jańa reformalarǵa sáıkes, emhanaǵa tirkeý men jedel járdem qyzmetiniń qandaı tártippen júzege asyrylatyny kórsetilgen.
«Jyl saıyn qyrkúıek-qarasha aralyǵynda emhanaǵa tirkeý naýqany uıymdastyrylady. Sońǵy eki jylda dástúrli naýqandy Medıtsınalyq saqtandyrý qory ótkizdi. Osyǵan qaraı, biz turǵyndardy múmkindiginshe úılerine jaqyn mańdaǵy emhanalarǵa tirkelý qajet ekendigin eskertip jatyrmyz. Munyń sebebi jedel járdem qyzmetiniń tıimdiligimen baılanysty. Birinshiden, bul úıde kishkentaı bala nemese qart kisiler aýyryp qalǵan jaǵdaıda dáriger shaqyrýǵa yńǵaıly. Ekinshiden, jedel járdem salasyndaǵy sońǵy reformalarǵa baılanysty endi 4-shi sanattaǵy shaqyrtýlar boıynsha qyzmetti jergilikti emhanalar kórsetedi», - deıdi «Áleýmettik medıtsınalyq saqtandyrý qory» KEAQ basqarýshy dırektory Zabıra Orazalıeva.
Onyń sózinshe, ótken jyly Densaýlyq saqtaý mınıstrligi jedel járdem júıesin reformalaýǵa kiristi.
«Atalǵan reforma boıynsha jedeldigi jaǵynan 4-shi sanatqa jatatyn shaqyrtýlar jergilikti emhanalarǵa berildi»,-deıdi maman.
