Jedel járdem kóligine jıektastardyń tıelýi: Stantsııa basshylyǵy jaýapqa tartyldy
QARAǴANDY. QazAqparat – Qaraǵandy oblysynyń Sátbaev qalasynda mamandandyrylǵan medıtsınalyq kólikke qurylys materıaldary tıelgeni úshin jedel járdem stantsııasynyń basshylary jaýapkershilikke tartyldy, dep habarlaıdy QazAqparat tilshisi.
Qaraǵandy oblysynyń Densaýlyq saqtaý basqarmasy jedel járdem kóligin maqsatsyz paıdalaný deregi boıynsha qyzmettik tergeý júrgizilgenin málim etti. Nátıjesinde oblystyq Jedel medıtsınalyq járdem stantsııasynyń dırektory men Sátbaev qalasynyń qosalqy stantsııasynyń meńgerýshisi jaýapkershilikke tartyldy.
Aıta keteıik, ótken demalys kúnderi Qaraǵandynyń tanymal pablıkteriniń birinde feldsher formasyn kıgen adamdar jedel járdem kóligine jıektastar tıep jatqany týraly vıdeo jarııalanǵan bolatyn. Ol halyq arasynda daý týdyryp, az ýaqyt aralyǵynda vıdeony qarap shyqqandar sany birneshe myńdy qurady.
Búgin Densaýlyq saqtaý basqarmasynda mamandandyrylǵan avtokólikti maqsatsyz paıdalaný jaǵdaıyna qatysty túsinikteme berildi.
«Bul jaǵdaı Sátbaev qalasynda bıylǵy 27 shildede boldy. Qosalqy stantsııa aýmaǵyndaǵy avtoturaqty jabdyqtaý úshin bloktar tasymaldanǵan. Alaıda, qosalqy stantsııa meńgerýshisi joǵary turǵan basshylyqty arnaıy kólik qajettiligi týraly habardar etpeı, jóndeýde turǵan jedel járdem mashınasyn paıdalaný týraly sheshim qabyldaǵan. Sátbaev qalasynyń qosalqy stantsııa meńgerýshisi tártiptik jaýapkershilikke tartylady. Sondaı-aq, oblystyq Jedel medıtsınalyq járdem stantsııasynyń dırektoryna tıisti baqylaýdy júzege asyrmaǵany úshin eskertý jarııalandy», - dep habarlady vedomstvonyń baspasóz qyzmetinen.
Sondaı-aq Densaýlyq saqtaý basqarmasy Sátbaev qalasynda 6 jedel medıtsınalyq járdem brıgadasy jumys isteıtinin jáne bul jaǵdaı halyqqa qyzmet kórsetý sapasyna esh áser etpegenin málimdedi.
