Jedel járdem qyzmetkerlerin balaǵattaǵan pavlodarlyq 2 táýlikke qamaldy
ASTANA. KAZINFORM — Mas kúıinde jedel járdem qyzmetkerlerin balaǵattaǵan er adam jazalandy.
Aqqýly aýdandyq soty medıtsına qyzmetkerlerine ózderiniń laýazymdyq mindetterin oryndaýy kezinde qurmetsizdik tanytý boıynsha aıyptalǵan azamatqa qatysty ákimshilik quqyq buzýshylyq týraly isti qarady.
Sot, 2026 jylǵy 14 shildede ıAmyshevo aýylynda er adam alkogoldik masań kúıde bolyp shaqyrtý boıynsha kelgen jedel medıtsınalyq járdem brıgadasynyń qyzmetkerlerine qatysty bylapyt sózder aıtqanyn anyqtady. Onyń áreketi QR Ákimshilik quqyq buzýshylyq týraly kodeksi 80-1-babynyń 2-bóligi boıynsha saralandy.
Sot otyrysynda quqyq buzýshy óz kinásin tolyq moıyndap, jasaǵan áreketine ókindi. Jaza taǵaıyndaý kezinde sot jaýaptylyqty jeńildetetin mán-jaılar retinde: onyń kinásin moıyndaýy men ókinýin, is boıynsha aýyrlatatyn mán-jaılardyń joqtyǵyn eskerdi.
— Sot qaýlysymen azamat kináli dep tanyldy. Oǵan 2 táýlik merzimge ákimshilik qamaqqa alý túrindegi jaza taǵaıyndaldy. Sonymen qatar, 3 aı merzimge minez-qulqyna erekshe talaptar belgilendi: alkogoldik ishimdikterdi, esirtki quraldary men psıhotroptyq zattardy tutynýǵa tyıym salyndy, sondaı-aq apta saıyn ýchaskelik polıtsııa ınspektoryna profılaktıkalyq áńgimelesýge kelip turýǵa mindetteldi, — delingen habarlamada.
Sot qaýlysy zańdy kúshine engen joq.
Bul óńirdegi alǵashqy oqıǵa emes. Osyǵan deıin Pavlodarda er adam jedel járdem brıgadasyna pyshaqpen shabýyldaǵanyn jazǵanbyz.
