Jedel járdem dárigerleri sportta baǵyn synady
ALMATY. QazAqparat - Almatyda jedel járdem dárigerleriniń arasynda respýblıkalyq spartakıada ótti, dep habarlaıdy QazAqparat tilshisi.
Dúbirli dodaǵa qatysýǵa Qazaqstannyń túkpir-túkpirinen 10 brıgada jınaldy.
Feldsher mamandar men medbıkeler jeńil atletıka, júzý, shaǵyn fýtbol, basketbol, voleıbol tárizdi sport túrlerinen baq synasty.
Eki kúnge sozylǵan sporttyq oıyndarda jalpy esepte úshinshi oryndy Semeı komandasy, ekinshi oryndy Astana komandasy ıelendi. Jarysta Almaty jedel járdem stansasy aýrýhanasynyń mamandary top jaryp, birinshi oryndy enshiledi.
«Sporttyq sharaǵa belsendi qatysqan medbıkeler men feldsherlerge alǵysymyz sheksiz. Sizder eren eńbek pen tabandylyqtyń arqasynda jeńiske jettińizder. Biz medıtsınalyq saqtandyrý degen úlken ózgeristiń aldynda turmyz. Adam densaýlyǵynyń qadirin bilýi kerek. Biz, aq halattylar ony birinshi kezekte ózimizdiń is-áreketimizben uǵyndyrýǵa tıispiz. Osy maqsatta atalǵan spartakıada uıymdastyryldy», - dedi qalalyq Densaýlyq saqtaý basqarmasynyń basshysy Ýálıhan Ahmetov.
Jeńimpazdardyń barlyǵy arnaıy syılyqtarmen marapattaldy.
