Jedel járdem brıgadasynan qandaı dári-dármek talap ete alasyz
ASTANA. KAZINFORM – Densaýlyq saqtaý mınıstrligi Kazinform saýalyna joldaǵan jaýapta shaqyrýǵa shyqqan jedel járdem brıgadasy ózimen birge qandaı dári-dármek alyp júrýi kerektigin aıtty.
Másele qaıdan shyqty?
1 mamyrdan bastap jedel járdem qyzmeti men mobıldi brıgadalar ekige bólinip jumys isteı bastady.
Naqtyraq aıtsaq, jedeldik dárejesi 1, 2, 3-sanatqa jatatyn qońyraýlarǵa dástúrli jedel járdem qyzmeti 24 saǵat boıy qyzmet kórsetse, 4-sanattaǵy qońyraýlarǵa emhanalar janyndaǵy mobıldi brıgadalar saǵat 8.00-20.00 aralyǵynda qyzmet kórsetetin bolǵan. Al saǵat 20.00-den erteńgi saǵat 8.00-ge deıin bul sanattyń qońyraýlary boıynsha da jedel járdem brıgadalary shyǵýy shart.
Bul jerdegi 1, 2, 3-sanat dep otyrǵanymyz – ınfarkt, ınsýlt, tynys alý nemese júrek jumysyndaǵy ótkir aqaýlar, qan ketý, soqqy alý nemese jaraqattaný sekildi jaǵdaılarmen baılanysty qońyraýlar.
Al 4-sanatqa sozylmaly aýrýy bar naýqastardan, dene qyzýy kóterilgenderden, júkti áıelder men jas bosanǵan analardan, t. b. túsetin qońyraýlar jatqyzylǵan.
Eki brıgadanyń aıyrmashylyǵy nede?
Buǵan deıin jedel járdem brıgadalarynyń shaqyrtý túsken orynǵa jetý ýaqyty bylaısha kórsetilgen:
- 1-jedeldik sanaty - 10 mınýtqa deıin
- 2-jedeldik sanaty - 15 mınýtqa deıin
- 3-jedeldik sanaty - 30 mınýtqa deıin.
- Al mobıldi brıgadalar qyzmet kórsetetin - jedeldik sanatyndaǵy qońyraýlarǵa jetý ýaqyty – 60 mınýtqa deıin.
Jınalmaly sómkeniń ishinde ne bolý kerek?
- Jedel medıtsınalyq kómek (budan ári JMK) sómkesi mobıldi brıgadalardyń sómkesinen dári-dármekterdiń jınaǵy boıynsha erekshelenedi. JMK sómkesi naýqastyń jaǵdaıyn turaqtandyrý úshin qajetti dári-dármekter men medıtsınalyq quraldar jınaǵyn qamtıdy. Bul sómke, ádette, aýrýhanadan buryn kómek kórsetý úshin qajet bolatyn aýyrsynýdy basatyn dáriler, allergııaǵa qarsy preparattar, ótkir jaǵdaılardy toqtatý úshin qajetti dári-dármekter (mysaly, ınfarkt, ınsýlt, anafılaksııalyq shok jaǵdaılarynda) jáne jaraqattar men kúıikterge alǵashqy kómek kórsetý quraldaryn qamtıdy, - dep jazylǵan málimette.
Al 1 mamyrdan bastap saǵat 8.00-20.00 arasynda 4-sanattaǵy shaqyrýlarǵa (sozylmaly aýrýy bar naýqastar, dene qyzýy kóterilgender, júkti áıelder men jas bosanǵan analar, t.b. – red.) shyǵý mindettelgen mobıldi brıgadalardyń dári-dármek qorjyny dástúrli jedel járdem sómkesinen jutańdaý bolmaq.
- Medıtsınalyq-sanıtarııalyq alǵashqy kómek uıymdarynyń mobıldi brıgadalarynyń sómkesi quram jaǵynan JMK brıgadalarynyń sómkesine qaraǵanda shekteýli bolady. Bul mobıldi brıgadalardyń negizgi qyzmeti shuǵyl jaǵdaılarǵa emes, ambýlatorlyq deńgeıdegi medıtsınalyq kómek kórsetýge baǵyttalǵanymen túsindiriledi. Sondyqtan olardyń sómkesinde negizinen qarapaıym dári-dármekter men qural-jabdyqtar – mysaly, qyzý túsiretin, aýyrsynýdy basatyn jáne taǵy da basqa preparattar bolady.
Sonymen, eki sómkeniń arasyndaǵy negizgi aıyrmashylyq – olardyń fýnktsıonaldyq maqsatynda jáne dári-dármek jıyntyǵynyń ártúrliliginde, sebebi ártúrli medıtsınalyq jaǵdaılarǵa kómek kórsetý úshin ártúrli dári-dármekter men quraldar qajet, - dep jazady mınıstrlik mamandary.
Qaı brıgada qandaı kólikpen júredi?
Jaýapta bul eki brıgadanyń minetin kólikteri de eki túrli ekeni aıtylǵan.
- 1-3 jedeldik sanatyndaǵy shaqyrýlarǵa (dástúrli jedel járdem) V jáne S klasyndaǵy sanıtarlyq avtokólikter paıdalanylady. V klasyndaǵy sanıtarlyq avtokólik ádette naýqastardy turaqty jaǵdaıymen tasymaldaýǵa arnalǵan, al S klasyndaǵy sanıtarlyq avtokólik reanımatsııalyq is-sharalar men qarqyndy terapııany júrgizip, naýqastardy tasymaldaýǵa múmkindik beredi. Bul kólik túri, sondaı-aq ómirlik mańyzdy fýnktsııalardy qoldaý úshin arnaıy jabdyqtarmen jabdyqtalǵan jáne reanımobıl dep te atalady, - dep jazylǵan mınıstrlik málimetinde.
Al mobıldi brıgadalarǵa A klasyndaǵy kólik berilip otyr.
- 4-jedeldik sanatyndaǵy shaqyrýlarǵa A klasyndaǵy sanıtarlyq avtokólik jáne MSAK uıymdarynyń medıtsınalyq kómeginiń mamandandyrylmaǵan jeńil avtokóligin paıdalaný kózdeledi. A klasyndaǵy sanıtarlyq avtokólik qarapaıym tasymaldaýdy talap etetin, biraq JMK qajet etpeıtin naýqastar úshin paıdalanylady. Sonymen qatar, medıtsınalyq-sanıtarııalyq alǵashqy kómek uıymdarynyń mamandandyrylmaǵan jeńil avtokólikteri ambýlatorlyq kómek kórsetý nemese jedel medıtsınalyq kómekti qajet etpeıtin jaǵdaılardy baqylaýǵa arnalǵan, - delingen jaýapta.