Jedel shtab quryldy: jaryqsyz qalǵan Qarajalda ne bolyp jatyr
QARAJAL. KAZINFORM — Qarajal qalasynda elektrmen jabdyqtaý júıesindegi apat saldarynan turǵyndar ekinshi táýlik qatarynan jaryqsyz otyr. Apat júzdegen turǵyn úı men birqatar áleýmettik mańyzy bar nysandardyń jumysyn shektedi. Ulytaý oblysy ákimdigi jaǵdaıdy baqylaýǵa alyp, apat saldaryn joıý úshin jedel shtab qurylǵanyn málimdedi.
Elektr energııasynyń apattyq ajyratylýy 17 jeltoqsan kúni saǵat 09:50–de tirkelgen. Elektr berý jelisindegi symnyń úzilýi saldarynan «Órken» JShS-niń podstantsııasynda 35 kV qorǵanys júıesi iske qosylǵan. Ulytaý oblysy ákimdiginiń habarlaýynsha, aqaý «Vest-2001» JShS balansyndaǵy jelide bolǵan.
Apattyq-qalpyna keltirý jumystary 18 jeltoqsan kúni tańǵy 05:00–ge deıin júrgizilip, nátıjesinde elektr energııasy ishinara qalpyna keltirildi. Alaıda saǵat 11:00–degi málimet boıynsha 385 abonent áli de jaryqsyz qalyp otyr. Onyń 380-i — jeke turǵyn úı sektory, sondaı-aq bes áleýmettik nysan: qala ákimdiginiń ǵımaraty, Qazposhta bólimshesi, Mádenıet saraıy jáne № 1 mektep.
Apat saldaryn joıý jumystaryna segiz elektrık pen tórt arnaıy tehnıka tartylǵan. Jumystardyń barysyn úılestirý úshin Qarajalǵa Ulytaý oblysy ákiminiń orynbasary Ulantaı Úsenov keldi. 18 jeltoqsan saǵat 11:00–den bastap aqaýdyń naqty sebebin joıýǵa baǵyttalǵan qosymsha tehnologııalyq ajyratýlar júrgizilýde. Saǵat 12:00–de oblys ákimi Dastan Ryspekovtiń tóraǵalyǵymen Óńirlik jedel shtabtyń otyrysy ótti.
Qala turǵyndary turmystyq qıyndyqtarǵa tap bolǵanyn aıtady. Qarajalda úılerdiń basym bóligi elektr sorǵylary arqyly jumys isteıtin peshtermen jylytylady. Elektr energııasynyń bolmaýy keıbir turǵyn úılerde jylytý júıelerinde muz qatýyna jáne isten shyǵýyna ákelgen.
Oblys ákimdiginiń málimetinshe, turǵyndar úshin ýaqytsha túneıtin oryndar uıymdastyrylǵan. Sonymen qatar qala kásipkerleri halyqty ystyq tamaqpen jáne nan ónimderimen qamtamasyz etip otyr.
Ulytaý oblysy ákiminiń orynbasary Ulantaı Úsenovtiń aıtýynsha, elektr jelileriniń menshik ıesi — «Vest-2001» JShS qalpyna keltirý jumystaryna der kezinde kirispegen. Kompanııa muny mamandar men tehnıkanyń jetispeýshiligimen túsindirgen. Osyǵan baılanysty jedel shtab qurylyp, jóndeý jumystaryna óńirdiń ónerkásiptik kásiporyndarynan, onyń ishinde taý-ken baıytý kombınattarynan qosymsha kúshter tartyldy.
Qazirgi ýaqytta Qarajalda elektrmen jabdyqtaýdy tolyq qalpyna keltirý jumystary jalǵasyp jatyr.
Buǵan deıin Batys Qazaqstan oblysynda qolaısyz aýa raıyna baılanysty 16 myńnan astam abonent elektr energııasynsyz qalǵany habarlanǵan bolatyn.