Jedel shtab elevatorlardyń astyqty jappaı qabyldaýǵa daıyndyǵyn qarastyrdy
ASTANA. KAZINFORM – Úkimette vıtse-premer Serik Jumanǵarınniń tóraǵalyǵymen ótken kúzgi dala jumystary jónindegi Jedel shtabtyń kezekti otyrysynda fermerlerdiń egin jınaýdy úzdiksiz júrgizýine kedergi keltiretin máseleleri qalaı sheshiletini talqylandy.
Otyrys barysynda astyq keptirý agregattaryn qoljetimdi baǵadaǵy suıytylǵan gazdyń qajetti kólemimen qamtamasyz etý máselesi oń sheshildi. Suıyq otynmen keptirý agregattary bar alty óńirdiń ákimdikteri qajettilik kólemin burynǵy 21,5 myń tonnadan 19,3 myń tonnaǵa deıin tómendetti. Qazirdiń ózinde Energetıka mınıstrligi tómendetilgen quny boıynsha 5,5 myń tonna bólgen bolsa, qalǵan 14 myń tonna kólemi óndirýshiden kommertsııalyq baǵa boıynsha satyp alynatyn bolady. Fermerler úshin otyn baǵasyn arzandatý memleket esebinen júrgiziledi. Qazirgi ýaqytta barlyq alty aımaqqa keptirgishterge suıytylǵan gaz jetkizilýde. Kúzgi-dala jumystaryna dızel otynyn jóneltý keste boıynsha júrgizilýde. 16 qyrkúıektegi derek boıynsha, 209,6 myń tonnadan astam jónelditldi, bul jospardyń – 59%-y.
Jańa ónimdi qabyldaý úshin elevatorlardan ótken jylǵy astyq daqyldaryn jóneltý qajet – jappaı egin jınaý bastalǵanǵa deıin Azyq-túlik korporatsııasynyń aldyna osy mindetti oryndaý qoıyldy. «Azyq–túlik korporatsııasy» UK AQ Basqarma tóraǵasy Asylhan Djývashev osy jyldyń tamyz-qyrkúıek aılarynda 1,5 mln tonna astyq shyǵarý josparlanǵanyn, onyń 736 myń tonnasy tamyz aıynda jóneltilgenin habarlady. Azyq-túlik korporatsııasynyń menshigindegi qorlary 300 myń tonnadan asady, jeke astyq ıeleriniń kólemi – 734 myń tonnadan asady.
QTJ 20 qyrkúıekten bastap astyqty jappaı jóneltýdi kútip otyr, bul maqsatqa elimizde 12 myńǵa jýyq astyq tasymaldaýshy daıyn. «QTJ» UK» AQ Basqarýshy dırektory Baýyrjan Orynbasarov atap ótkendeı, vagondardyń jalpy sanynan 6 myńǵa jýyǵy Qara jáne Baltyq teńizderiniń porttary baǵytynda astyqty eksportqa tasymaldaýdy qamtamasyz etýge daıyn.
Osy jyldyń segiz aıynda Ortalyq Azııa elderine astyq eksporty artýynyń belsendi serpini baıqalady – 2,5 mln tonna (1,8 mln tonna – Ózbekstanǵa, 600 myń tonna – Tájikstanǵa, 100 myń tonna – Túrikmenstan men Qyrǵyzstanǵa).
«Qyrkúıek aıynda 12 kúnin ishinde Ortalyq Azııa elderine 132 myń tonna jóneltildi, bul 2023 jylǵy qyrkúıektegi kórsetkishten 2,5 ese kóp. Aıdyń sońyna deıin astyqty jóneltý kólemi shamamen 250 myń tonnany quraıdy», - dep atap ótti «QTJ» UK» AQ basqarýshy dırektory Baýyrjan Orynbasarov.
Qytaıǵa astyq eksporty 2024 jyldyń 8 aıynda 1,1 mln tonnany qurady. Burynǵysynsha negizgi kólem konteınerlermen tasylady – 666,4 myń tonna. Biraq bıyl astyqty qaptarǵa salyp, jabyq vagondarmen tasymaldaý kólemi eki ese ósti – 229 myń tonna. Astyq tasıtyn kólikterde tasymaldaý kólemi ótken jyldyń deńgeıinde qaldy – 247,5 myń tonna (ótken jylǵa 96%).
2024 jyldyń 8 aıynda Qytaıǵa untaqtalǵan astyq ónimderin jetkizý 70%-ǵa ósti – 494,1 myń tonna (2023 jyly 290,3 myń tonna). Untaqtalǵan ónimderdi tasymaldaý negizinen konteınerler arqyly júzege asyrylady.
16 qyrkúıektegi jaǵdaı boıynsha Qazaqstanda 7,4 myń ga alqap (44%) jınaldy, ortasha ónimdilik gektaryna 14,6 tsentnerdi quraıdy, 10,8 mln tonna astyq bastyryldy. Elevatorlarǵa 1,5 mln tonna astyq tústi.
Otyrys qorytyndysy boıynsha Serik Jumanǵarın ákimdikter men jetekshilik etetin memlekettik organdarǵa astyq qabyldaý kezinde tarıfterdiń kóterilýine jáne aýyl sharýashylyǵy óndirýshileriniń múddelerine nuqsan keltirýge jol bermeýdi tapsyrdy.
