Jedel saýyqtyrý sharasy kezinde urlanǵan 41 kólik ıesine qaıtaryldy
ASTANA. Naýryzdyń 3-i. QazAqparat /Aıdar Ospanalıev/ - Elimizdiń birneshe aımaǵynda júrgizilgen «Kólik urlyǵy» saýyqtyrý sharasynyń barysynda tártip saqshylary kólikti urlaý, oǵan qaraqshylyq shabýyl jasaý jáne tonaýmen baılanysty 22 qylmystyń betin ashty.
Bul týraly búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń aıtýynsha, kólik urlyǵymen jáne onymen baılanysty qylmystardy anyqtaý, jaǵdaıdy saýyqtyrý maqsatynda júrgizilgen jedel saýyqtyrý sharasy aqpannyń 23-i men 27-si aralyǵynda Almaty qalasy men Almaty, Jambyl, Ońtústik Qazaqstan oblystarynyń aımaqtarynda júrgizilgen. «Nátıjesinde qoldy bolǵan 41 kólik ıelerine qaıtarylyp, 38 kúdikti qolǵa túsken. Almatylyq polıtseıler alaıaqtyq jolmen bireýdiń kóligin urlaýmen aınalysyp júrgen qylmystyq topty quryqtady», dedi departament bastyǵy.
Onyń sózine qaraǵanda, alaıaqtar kólik júrgizýshisin jalǵa alyp, oǵan ózderiniń jymysqy áreketteri jóninde oǵan esh bildirmesten kólikti júrgizýshiniń atyn tirkep, sodan soń ony satyp jiberip otyrǵan. Ótken aıdyń basynda qylmystyq top ókilderi tap osyndaı jolmen «Nıssan Kashkaı» avtokóligin satý úshin Shymkent qalasyna bara jatqan kezinde «Qordaı» beketinen ustaldy. «Qazirgi tańda olarǵa tap osyndaı alaıaqtyq jolmen «Mersedes-bents» kóligin urlap satty degen aıyp taǵylyp otyr.
