Jedel kómek kórsetý qyzmetteri daýyl soǵatyndyǵyn eskertýde
ASTANA. QazAqparat - Aldaǵy kúnderi Astanada aýa temperatýrasy tómendep, boran soǵady. Bul jaıynda Smart Astana qosymshasynda jarııa etildi, dep habarlaıdy QazAqparat.
«Osyǵan baılanysty «112 qyzmeti» turǵyndardan alys saparlarǵa shyqpaýǵa jáne jolda abaı bolýǵa shaqyrady. Kommýnaldyq qyzmetterdiń jumysyna kedergi jasamas úshin kólikterdi joldardyń boıynda qaldyrmaýdy suraıdy. Qala kósheleri men trotýarlardy tazalaý jumystary úzilissiz júrgizilip jatyr», - delingen habarlamada.
Sınoptıkterdiń derekterine qaraǵanda, 13 jeltoqsanda elordada kóshpeli bult shyǵady, tústen keıin qar jaýady, kóktaıǵaq bolyp, uıytqı boran soǵady. Ońtústikten, ońtústik-batystan sekýndyna 15-20 metrlik jyldamdyqpen soqqan jeldiń ekpini 23-28 m/s deıin kúsheıedi. Aýa temperatýrasy túnde -13...-15°S, kúndiz -3...-5°S.
Al 14 jeltoqsan kúni kóshpeli bult shyǵyp, oqtyn-oqtyn qar jaýady, kóktaıǵaq, boran soǵady. Ońtústik-batystan 9-14 m/s jyldamdyqpen soǵatyn jeldiń ekpini 15-20 m/s deıin kúsheıedi. Aýa temperatýrasy túnde -3...-5°S, kúndiz 0...-2°S. 15 jeltoqsanda elordada kóshpeli bult shyǵady, oqtyn-oqtyn qar jaýady, burqasyndatady. Soltústik-batystan 9-14 m/s jyldamdyqpen jel soǵady. Aýa temperatýrasy túnde jáne kúndiz -8...-10°S bolady.
