Jedel-izdestirý sharalarynyń barysynda Almatyda 10-nan astam páter tonaǵan urylar qolǵa tústi
ASTANA. Qarashanyń 16-sy. QazAqparat /Aıdar Ospanalıev/ - Qarashanyń 11-i kúni belgisiz bireýler Qaraǵandy oblysynyń Qazybek bı aýdanyndaǵy jaýapkershiligi shekteýli seriktestiginiń biriniń ǵımaratyna kirip, ondaǵy eki seıften túrli baǵaly zattardy jymqyryp ketken.
Al urylardyń birin toqtatpaq bolǵan mekemeniń 20 jasar kúzetshisi dene jaraqatyn aldy. Bul oqıǵa jóninde búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov baıandady, dep habarlaıdy QazAqparat.
Departament bastyǵynyń sózine qaraǵanda, tártip saqshylary osy oqıǵadan soń qalanyń 25 jasar turǵynyn ustap, ol osy is boıynsha tıisti málimetter berdi. Sondaı-aq Semeı qalasyndaǵy qaraqshylyq shabýylǵa qatysty degen aıyppen osy qalanyń birneshe ret sottalǵan turǵyny ustalyp, odan avtomattyń bólshekteri men ózge de zattaı aıǵaqtar tabyldy. «Qazirgi tańda osy iske qatysty ózge azamattar izdestirilýde jáne ustalǵandardyń respýblıka aımaǵyndaǵy ózge de qylmystarǵa qatystylyǵy tekserilýde. Al Almatylyq polıtseıler arnaıy jedel-izdestirý sharalarynyń barysynda Grýzııanyń Kýtaısı qalasynyń 35 jasar turǵyny men Pavlodar qalasynyń 30 jasar turǵynyn ustady. Olar Almaty qalasynda jalǵa alynǵan páterde ýaqytsha turyp jatqan. Grýzııalyq azamat páter tonaǵany úshin buryn 2 ret sottalyp, elimizdiń bas bostandyǵynan aıyrý oryndarynda 9 jyl otyrǵan. Eki ury «kásipterin» negizinen qalanyń biryńǵaı turǵyn úıleri ornalasqan aýdandarynda tek kúndizgi mezgilde júzege asyryp júrgen. Tekserý barysynda sybaılasqan ekeýdiń 10-nan astam páter tonaǵandyǵy anyqtaldy. Urlanǵan zattardy olar qalanyń bazarlarynda satyp júrgen. Urylar qamaýǵa alyndy», dedi Q.Jumanov.
