Jibek jolynyń rýhy Qytaı men Ortalyq Azııa arasyndaǵy naqty nátıjelerge aınaldy — elshi
ASTANA. KAZINFORM — Ortalyq Azııa elderi táýelsizdik alǵan otyz jyldan astam ýaqytta Qytaı senim men dostyqty negiz etip, damý jolyn birlesip aıqyndap, ózara túsinistik pen qoldaýdy berik ustanyp keledi.
Bul týraly Qytaıdyń Qazaqstandaǵy Tótenshe jáne Ókiletti elshisi Han Chýnlın «Tatý kórshilik jáne dostyq: bolashaqqa birge qadam» atty Qytaı men Ortalyq Azııanyń gýmanıtarlyq almasý forýmynda aıtty.
— Eki myń jyldan astam ýaqyt buryn Han áýletiniń ókili Chjan Tsıan Batys óńirge sapar shegip, Qytaı men Ortalyq Azııa arasyndaǵy dostyq qarym-qatynastyń negizin qalap, Uly Jibek jolynyń negizin qalady. Sol kóne kerýen joly Qytaı men Ortalyq Azııa órkenıetterin tyǵyz baılanystyrdy. Bul beıbit yntymaqtastyq, ashyqtyq pen ózara qurmet, tájirıbe almasý men ortaq tabysqa negizdelgen Jibek joly rýhynyń bastaýy boldy. Qazir de Qytaı men Ortalyq Azııa elderiniń qaýymdastyǵyn birge qurý jolynda qýatty rýhanı tirek boldy, — dedi Han Chýnlın.
Onyń aıtýynsha, Qytaı bul ıdeıany usynýshy ǵana emes, ony belsendi júzege asyryp kele jatqan el.
— Ortalyq Azııa elderi táýelsizdik alǵan otyz jyldan astam ýaqytta Qytaı osy eldermen senim men dostyqty negiz etip, damý jolyn birlesip aıqyndap, qaýipsizdik salasynda ózara jaýapkershilik alyp, ózara túsinistik pen qoldaýdy berik ustanyp keledi. Biz saıası senimdi nyǵaıtyp, strategııalyq baılanysty kúsheıtip kelemiz. Ózara múddelerge qatysty máselelerde árdaıym bir-birimizge qoldaý kórsetemiz. «Bir beldeý, bir jol» bastamasyn Ortalyq Azııa elderiniń ulttyq damý strategııalarymen ushtastyra otyryp, materıaldyq yntymaqtastyqty tereńdetip, qaýipsizdik pen damý kepildigine negizdelgen aýqymdy ári uzaqmerzimdi seriktestikti jolǵa qoıyp kelemiz, — dedi elshi.
Sonymen birge, kóne Jibek jolynyń rýhy Qytaı men Ortalyq Azııa arasyndaǵy ózara is-qımylda únemi jańǵyryp, búginde naqty nátıjege aınalýda.
— Jaqynda ótetin ekinshi Qytaı–Ortalyq Azııa sammıtinde 6 eldiń kóshbasshysy yntymaqtastyq pen ortaq tabysty kózdeıtin jańa kezeńdi birge bastaıdy. Búgingi shara Qytaı men Ortalyq Azııa halyqtarynyń órkenıetterin ózara qurmetteý, beıbit qatar ómir súrý jáne bir-birinen úırenip, birlesip damytý taqyrybyna negizdelgen, — dedi Qytaıdyń Qazaqstandaǵy Tótenshe jáne Ókiletti elshisi.
Aıta keteıik, búgin elordada «Tatý kórshi jáne dostyq: bolashaqqa qadam Qytaı-Ortalyq Azııa gýmanıtarlyq almasý» forýmy ótti. Forým aıasynda «Sı Tszınpınniń súıikti naqyl sózderi» jobasynyń halyqaralyq nusqasynyń tusaýkeseri ótti. «Kıim rámiz retinde: Qytaıdan — álemge» jáne Qytaıdyń CGTN telearnasynyń jýrnalısteri Qazaqstannyń Jibek Joly/Silk Way arnasynyń qoldaýymen júzege asyrǵan «Ortalyq Azııa boıynsha úlken sapar» jobalary qorytyndylandy. Bul joba aıasynda Qazaqstandaǵy ómir týraly reportajdar serııasy túsirildi.
Sonymen qatar Qytaı men Ortalyq Azııa elderiniń jetekshi BAQ platformalarynda júretin «Men Qytaıda oqydym» baǵdarlamasynyń bastalǵany jarııalandy.