«Jibek jolyndaǵy Naýryz-dýman!» Jibek Joly telearnasynan tikeleı efırde kórsetildi
TÚRKІSTAN. KAZINFORM- Telearna ásem ánder men qyzyqty suhbattardy kórermen nazaryna usyndy.
Búgin Túrkistan qalasynda kún raıy +19 kórsetip tur. Halyqtyń da kóńil kúıi kóterińki. Ulttyq kıimmen kóshe aralap, merekelik serýen quryp júr. Ásirese, Qoja Ahmet ıAsaýı kesenesine kelýshiler kóp. Baba rýhyna taǵzym etip, sondaǵy uıymdastyrylǵan sharalardy tamashalaýda.
Jibek Joly telearnasy kesene mańyndaǵy alańnan tikeleı efırge shyǵyp, «Jibek jolyndaǵy Naýryz-dýman!» merekelik is sharasyn kórermen nazaryna usyndy.
Júrgizýshiler Jandáýren Mádı men Nargız Ibragım Naýryz naqyshtarynan keń kólemde málimet berdi.
Al, jýrnalıst Altynbek Ámıt Túrkistandaǵy áz-Naýryz is sharasynan aqparat usyndy. Merekege oraı arnaıy daıyndalǵan 2,5 tonna naýryz kójeniń erekshelikterin jetkizdi. Halyqqa kóje 150 teńgeden satyldy. Jınalǵan barlyq qarajat balalar úıine qaıyrymdylyq retinde beriledi.
Túrkistan oblysynyń ákimi Nuralhan Kósherov óńirde júzege asyp jatqan jumystarmen tanystyryp, merekelik lebizin jetkizdi.
Búginde shaharda halyqaralyq talapqa saı eskek esý kanaly men «Qolónershiler qalashyǵynyń» qurylysy júrgizilip, zaman talabyna saı ıppodrom salynyp jatyr. Qalany týrıstik ortalyqqa aınaldyrý baǵytynda jumystar da jandanyp keledi. Shahardaǵy ındýstrıaldy aımaqta ashylǵan zaýyttarda jumystar qarqyny artqan.
Kóshpeli stýdııaǵa kelgen Túrkistan oblystyq ázerbaıjan etnomádenı birlestiginiń tóraıymy Ramılııa Mýstafaeva naýryz merekesin atap ótýdegi erekshelikter jaıynda aıtty.
Al, áýletinde 8 etnos ókili turyp jatqan Qazbek Mahmýdov el birligi eń basty qundylyq ekendigin jetkizdi.
— Ákem - ázerbaıjan, anam - qazaq. Al, áıelim - ózbektiń qyzy. Áýletimizde túrik, grýzın, sheshen de bar. Barshamyz bir otbasynda tatý tátti ǵumyr keship kelemiz, - dedi Qazbek Mahmýdov.
Merekelik is-sharada jýrnalıst Aqdarıǵa Muhaddas Astanadaǵy Naýryz merekesinen habar taratty. Etnoaýyldaǵy kórmege Qytaı, Reseı, Ázerbaıjan, Qyrǵyzstan, Ózbekstan, Túrikmenstan, Túrkııa, Iran, Tájikstan elderinen kelgen sheberler tikeleı efır arqyly kópshilikti merekemen quttyqtady.
Tikeleı efırge Almatydan qosylǵan Gúlzat Saq robottarǵa deıin shapan kıip Naýryz merekesin toılap júrgenin aıtty.
Al, mańǵystaýlyqtar ulttyq kıim kııýden álemdik rekord ornatyp, Gınnes rekordtar kitabyna endi. Bul týraly tilshi Aıman Nurmaǵanbet kópshilikke aqjoltaı habardy jetkizdi.
Búgin Aqtaýdaǵy Kaspıı teńiziniń jaǵasynda «Best fest Nauryz» festıvali ótip jatyr. Onda ulttyq kıim kıip shyqqan 5000-nan astam adam álemge qazaqtyń ulttyq kıimin tanystyrdy. Іs-sharaǵa London qalasyndaǵy Gınnes rekordtar kitabynyń shtab-kvartırasynan ókilder arnaıy kelip qatysty. Іs-sharanyń uıymdastyrýshysy Ásemgúl Adambaı ıdeıanyń saıahattaýdan keıin týǵanyn jetkizdi. Bul sharaǵa eriktiler kóp úles qosqan.
Tikeleı efırde Túrkistandaǵy Kongress-Hol kópsalaly kesheninde ótip jatqan dúbirli aıtys kópshilik nazaryna usynyldy. Etnoaýyldaǵy Naýryz merekesinen habar taratyldy.
Shyǵys Qazaqstan, Oral, Qostanaı, Shymkenttegi tilshiler tikleı baılanysqa qosylyp merekelik atmosferany jetkizdi.
Merekelik shara barysynda estrada juldyzdary Qanat jáne Sveta Aıtbaevtar, Nazar toby, Saıat Medeýov ásem ánderimen kórermenderge kóterińki kóńil kúı syılady.
Kóshpeli stýdııaǵa eńbek adamdary da shaqyryldy. Túrkistan oblysyna tanymal «Keńesbaı ata» Sharýa qojalyǵynyń tóraǵasy Keńesbaı Tólegen qatysty. Birneshe jyldan beri jylqy jáne mal sharýashylyǵymen aınalysatyn áýlet búginde 6 adamdy jumyspen qamtyp keledi. Ákeden balaǵa mura bolyp kele jatqan kásip jyl saıyn keńeıip keledi.
Al, alda sambo jáne jaýyngerlik sambodan eresekter arasyndaǵy Álem chempıony Nurıla Asanqyzy men qazaq kúresinen Álem chempıony Aıjan Jylqybaeva sporttaǵy qyzyqty sátterdi baıandaıtyn bolady. Túrkistan qalasynyń ákimi Ázimbek Pazylbekuly suhbat berip, aldaǵy ýaqytta júzege asatyn jumys barysymen tanystyrady dep kútilýde.
Aıta keteıik, budan buryn Túrkistanda 2,5 tonna naýryz kóje pisirilgenin jazǵan bolatynbyz.
