Jibek jolyn jańǵyrtyp jatyrmyz – EýroOdaqtyń Qazaqstandaǵy Elshisi
ASTANA. KAZINFORM – Eýropalyq Odaqtyń ejelgi Jibek jolynyń týrıstik áleýetin jańǵyrtý baǵytyndaǵy jumystary tanystyryldy.
Búgin Astanada Eýropalyq Odaqtyń qarjylandyrýymen ıÝNESKO-nyń Almatydaǵy aımaqtyq keńsesi 2018 jyldan beri iske asyryp kelgen «Ortalyq Azııadaǵy Jibek joly murasynyń dálizderi – Eýropalyq mádenı mura jylynyń halyqaralyq aspektileri» atty aýqymdy óńirlik jobasynyń nátıjeleri jarııalandy.
Jobanyń maqsaty – Jibek jolynyń mádenı murasyn saqtap, nasıhattaýǵa, materıaldyq jáne materıaldyq emes muranyń qundylyǵyn arttyrý, sondaı-aq, Ortalyq Azııa elderinde murany basqarý salasyndaǵy adamı jáne ınstıtýtsıonaldy áleýetti nyǵaıtýǵa baǵyttalǵan. Onyń aıasyndaǵy barlyq bastama óńirdiń turaqty damýyndaǵy mádenıettiń róli men qosatyn úlesin nyǵaıtýǵa arnalǵan.
«Búginde Ortalyq Azııa men Eýropany qosatyn Transkaspıı kólik dálizin damytýmen aınalysyp, ıaǵnı bizdi kóp ǵasyr buryn baılanystyrǵan Jibek jolyn jańǵyrtyp jatyrmyz. Joba ata-babalarymyzdyń murasyn saqtap qalýǵa jáne búkil Ortalyq Azııany baılanystyrǵan áıgili mádenı qazynany nasıhattaýǵa septigin tıgizdi. Atqarylǵan jumysymyz ejelgi salt-dástúrlerge súıene otyryp, bolashaqty qurýǵa kómektesedi degen úmittemiz. Sonymen qatar, Jibek joly boıynda ornalasqan elder jeke týrıstik baǵyttardy quryp, jergilikti tabıǵattyń sulýlyǵy men baı mádenıetine qyzyǵýshylyqty arttyryp, jergilikti halyqqa paıdasyn tıgizedi dep senemiz», - dedi Eýropalyq Odaqtyń Qazaqstandaǵy Elshisi Kestýtıs ıAnkaýskas.
Eýropalyq Odaq qarjylaı qoldap otyrǵan jobanyń negizgi is-sharalary Jibek Joly boıyndaǵy nysandardy qalpyna keltirý, mádenı mura negizinde týrıstik áleýetti arttyrý, sonymen qatar, benefıtsıar-memleketterdegi materıaldyq emes mádenı murany saqtaý máselelerin qamtyǵan.
Sondaı-aq, Ortalyq Azııa elderindegi Qulan ortaǵasyrlyq qalashyǵy (Qazaqstan), Qyzyl ózen ortaǵasyrlyq qalashyǵy (Qyrǵyzstan), Tájikstan ulttyq saıabaǵy (Tájikstan) jáne Hıýadaǵy (Ózbekstan) búkilálemdik mura nysandaryn qaıta qalpyna keltirý jumystary júrgizilgen.
