«Jibek joly» týrnıri: Qazaqstandyq alty boksshy jartylaı fınalǵa shyqty

ASTANA. KAZINFORM — Ázerbaıjan astanasy Baký qalasynda ótip jatqan «Jibek joly» halyqaralyq týrnırinde tórtinshi jarys kúniniń nátıjesi belgili boldy.

Bul kúni elimizdiń quramasynan barlyǵy on bes boksshy sharshy alańǵa shyqty. Olardyń arasynan altaýy jartylaı fınalǵa joldama alsa, qalǵany qarsylasyna ese jiberip qoıdy.

Áıelder arasynda bes boksshynyń tórteýi jarys jolynan shyǵyp qaldy. 48 kelide Gúlnaz Bóribaeva reseılik Karına Feızýlınany 3:0 esebimen tize búktirse, atalǵan salmaqta Aqbota Bolat ázerbaıjandyq Anaha Ismaılova, Roksana Gasymova ózbekstandyq Jasmın Tahırovaǵa 0:5 esebimen jeńilip qaldy.

Sondaı-aq Shahnaz Isaeva (57 keli) reseılik Darıa Abramova 2:3, Ásel Toqtasyn (81 keliden joǵary) reseılik Ksenııa Olıfrıenkoǵa 0:5 esebimen jol berdi.
Al erler arasynda Erhan Turdan (57 keli) ózbekstandyq Sobırjon Tastasanov, Dýlat Bekbaýov (67 keli) ázerbaıjandyq Zaýr Kahramanov, Asylhan Kósherbaı (67 keli) ázerbaıjandyq Výgar Mamedov, Nurbek Mursal (71 keli) grýzııalyq Eskerhan Madıev, Sanjaráli Begalıev (75 keli) qyrǵyzstandyq Islombek Týrgýnovtan basym tústi.

El quramasynan Ramazan Nurlybaev (51 keli) ázerbaıjandyq Nıjat Gýseınov, Erbolat Sabyr (57 keli) ózbekstandyq Nodırbek Allabergenov, Óner Seıilhan (75 keli) ázerbaıjandyq Seıdjamshıd Jafarov, Maqsat Ótegenov (75 keli) reseılik Amın Kýshkov, Danııar Raqymberdınov (92 keliden joǵary) ázerbaıjandyq Domınges Alfonso Lorenbertoǵa jeńilip qaldy.