«Jibek Joly» ótkizý pýnkti jabylady

ASTANA. KAZINFORM – Ózbekstan tarapymen «Gısht-Kýprık» ótkizý pýnktiniń qurylysyn aıaqtaý úshin 4 aıǵa jabylýyna baılanysty, 5 aqpannan bastap Qazaqstan tarapyndaǵy «Jibek Joly» ótkizý pýnkti de jabylady.

Osyǵan baılanysty Qarjy mınıstrliginiń Memlekettik kirister komıteti joǵaryda atalǵan ótkizý pýnktteri arqyly shekarany jaıaý jáne kólikpen ótetin jeke tulǵalarǵa jol júrý baǵyttaryn aldyn ala qarastyrý qajet ekenin habarlaıdy.

Bul rette, jaıaý júrginshiler ótkeli «Qaplanbek», «B.Qonysbaev» ótkizý pýnktteri men «Syrdarııa» jáne «Tselınnyı» baqylaý-ótkizý pýnktteri arqyly júzege asyrylatynyn habarlaımyz, - delingen Memlekettik kirister komıtetiniń baspasóz qyzmeti taratqan habarlamada.

Júk avtokólik quraldaryn ótkizý ádettegideı «B.Qonysbaev», «Atameken», «Qazyǵurt» jáne «Tájen» ótkizý pýnktteri arqyly, al temir jol kóligimen ótkizý «Saryaǵash» jáne «Beıneý» temir jol ótkizý pýnktteri arqyly júzege asyrylatyn bolady.