Jibek Qulambaeva Serbııadaǵy týrnırdiń shırek fınalyna joldama aldy

ORAL. KAZINFORM – Qazaqstandyq tennısshi, álemniń 337-raketkasy Jibek Qulambaeva Serbııada ótip jatqan ITF W75 týrnıriniń shırek fınalyna shyqty.

Jarystyń 7-raketkasy bolyp tirkelgen Qulambaeva aldymen reıtıngide 480-oryndaǵy kort ıesi Anıa Stankovıchti qapy qaldyrdy – 6:3, 6:2.

Qazaqstandyq tennısshi 1/8 fınalda reıtıngide ózinen úsh saty joǵary turǵan túrkııalyq Aıla Aqsýmen tartysty match ótkizdi. Birinshi partııada Jibek qarsylasyna des bergen joq – 6:2. Ekinshi sette birden breık jasap, alǵa shyqqanymen, basymdylyqty ustap tura almady - 3:6. Degenmen sheshýshi, úshinshi sette Qulambaeva oıyn tizginin ýysynan shyǵarmady – 6:2. Báseke eki saǵatqa jýyq ýaqytqa sozyldy. 

Jibek Qulambaeva jartylaı fınalǵa shyǵý úshin reıtıngide 369-oryndaǵy Malta ókili Francheska Kýrmımen sheberlik talastyrady. Qazaqstandyq tennısshi qazirgi kezde WTA Live reıtıngisinde 329-orynǵa kóterilip tur.

Eske sala keteıik, budan buryn Elena Rybakınanyń Strasbýrg jarysynyń jartylaı fınalyna shyqqanyn jazǵan bolatynbyz.