Jibek Qulambaeva Nıderlandtaǵy týrnırde aıqyn jeńiske qol jetkizdi
ASTANA. KAZINFORM — Qazaqstandyq tennısshi Jibek Qulambaeva juptyq synda Amstelven (Nıderland) ITF W35 týrnıriniń shırek fınalyna shyqty.
Belgııalyq Polına Bahmýtkınamen birge jarystyń 1-raketkasy bolyp tirkelgen J.Qulambaeva alǵashqy aınalymda amerıkalyq Gabrıela Vılar – Polsha ókili Veronıka Falkovskadan qınalmaı ótti.
Birinshi partııa 6:3 esebimen aıaqtalsa, ekinshi sette qazaqstandyq-belgııalyq jup tipti bet qaratpady – 6:0.
Match nebári 58 mınýtta bitti.
Jibek Qulambaeva – Polına Bahmýtkına jartylaı fınalǵa shyǵý úshin nıderlandylyqtar Djoı de Zeeýv – Antonııa Stoıanovpen talasady.
Osylaısha, qazaqstandyq tennısshi juptyq synda sátti óner kórsetýin jalǵastyryp keledi.
Aldyńǵy aptada Jibek ýkraınalyq Valerııa Strahovamen birge Bolgarııadaǵy jarystyń jeńimpazy atanǵan edi. Al ótken aptada majarstandyq Amarıssa Totpen birge Polshadaǵy dodada fınalǵa deıin jetti. Sonyń nátıjesinde J.Qulambaeva juptyq synda dúısenbide jańartylǵan álemdik reıtıngide 173-ten 167-orynǵa kóterildi.
Eske sala keteıik, budan buryn Elena Rybakınanyń Ýımbldon týrnıriniń ekinshi aınalymyna shyqqanyn jazǵan edik.
Ýımbldon týrnırinde Aleksandr Býblık alǵashqy qarsylasyn kambekpen jeńdi.
