Jibek Qulambaeva Qytaıdaǵy jarystyń jartylaı fınalyna joldama aldy
ASTANA. KAZINFORM — Qazaqstandyq tennısshi Jibek Qulambaeva juptyq synda Gýanchjoý (Qytaı) WTA 250 týrnıriniń jartylaı fınalyna shyqty.
Qazaqstandyq tennısshi nıderlandylyq Izabel Hoverlagpen birge shırek fınalda jarystyń 1-raketkalary, reseılik Marııa Kozyreva — ulybrıtanııalyq Maııa Lýmsdenge tap keldi.
Birinshi partııada favorıt sanalǵan reseılik-ulybrıtanııalyq dýet 6:3 esebimen basym tústi.
Ekinshisinde qazaqstandyq-nıderlandylyq jup dál sondaı eseppen jaýap berdi. Sodan soń sýper taı-breıkte tarazy basyn aýdara bildi — 10:8.
Bir saǵat 23 mınýtqa sozylǵan básekede Qulambaeva — Hoverlag 2 eıspen birge 9 breık-poınttyń úsheýin paıdalandy. Kozyreva — Lýmsden 3 breık-poınttan shashaý shyǵarǵan joq.
Jibek Qulambaeva — Izabel Hoverlagtyń jartylaı fınaldaǵy qarsylastary keıin belgili bolady.
J.Qulambaeva osy tabysy nátıjesinde qazirgi kezde WTA Live reıtıngisinde 102-den 95-orynǵa kóterilip, sporttyq jolynda alǵash ret TOP-100-ge kirdi.
Eske sala keteıik, budan buryn Tokıo týrnırinde grekııalyq tennısshini utqan Pýtıntsevanyń Rybakınamen oınaıtynyn jazǵan edik.
