Jibek Qulambaeva: Qazaqstan quramasy sapynda alǵashqy jeńiske qol jetkizgenime qýanyshtymyn
Jibek Qulambaeva Ispanııanyń Sevılıa qalasynda ótip jatqan Bıllı Djın Kıng kýboginiń fınaldyq kezeńinde Slovenııamen matchta qurama sapyndaǵy alǵashqy jeńisine qol jetkizdi, dep habarlaıdy Kazinform.
Jibek Qulambaeva komandalyq álem chempıonatyna kúni buryn ázirlengenin aıtty.
«Mundaı múmkindik týǵanyna qýanyshtymyn. Birinshiden, elimniń namysyn qorǵadym. Ekinshiden, sheshýshi, juptyq básekede Anna Danılınamen birge jeńiske jettik. Men óz oıynyma rızamyn. Ulttyq qurama sapynda óner kórsetýdi kópten armandadym. Bul men úshin óte mańyzdy», - dedi Jibek Qulambaeva.
Team Kazakhstan akademııasynyń túlegi J.Qulambaeva 7 jasynan beri tennıspen aınalysyp keledi. Qazirgi kezde juptyq synda álemdik reıtıngide 151-orynda tur. Jýyrda Jibek juptyq synda ITF týrnırlerinde bıylǵy jetinshi tıtýlyna qol jetkizdi. Sporttyq jolynda onyń osyndaı 26 jeńisi bar.
Ulttyq qurama sapynda 2022 jyly Astanada Bıllı Djın Kıng kýboginiń irikteý kezeńinde Germanııamen matchta alǵash ret kortqa shyqty. Onda Anna Danılınamen birge qarsylastaryna jol berdi.
Eske sala keteıik, budan buryn tennısten álem chempıonatynda Qazaqstan Slovenııany jeńgenimen, kelesi kezeńge óte almaǵanyn jazǵan bolatynbyz.
