Jibek Qulambaeva Bolgarııadaǵy jarystyń fınalyna joldama aldy
ASTANA. KAZINFORM – Qazaqstan ulttyq quramasynyń múshesi Jibek Qulambaeva juptyq synda Haskovo (Bolgarııa) ITF W50 týrnıriniń fınalyna shyqty.
Ýkraınalyq Valerııa Strahovamen birge jarystyń birinshi raketkasy bolyp tirkelgen qazaqstandyq tennısshi jartylaı fınalda bolgarııalyqtar Ralıtsa Aleksandrova - Valerııa Garnevskamen sheberlik baıqasty.
Birinshi partııada qazaqstandyq-ýkraınalyq jup 5:1 esebimen alǵa ketti. Sol basymdylyǵynan aıyryla qoıǵan joq – 6:2.
Ekinshi sette Qulambaeva men Strahova taǵy da 4:1 esebimen alǵa shyqqanymen, bolgarııalyq jup tarazy basyn teńestirdi – 4:4. Degenmen Jibek pen Valerııa taǵy bir breıkke qol jetkizip, matchty jeńispen túıindedi – 6:4.
Báseke saǵat jarymǵa jýyq ýaqytqa sozyldy.
Jibek Qulambaeva men Valerııa Strahova fınalda grekııalyq Marta Matýla - amerıkalyq Hıba Shaıhpen bas júldege talasady.
Búgin J.Qulambaeva jekeleı syndaǵy kezdesýin de ótkizdi. Shırek fınalda Jibek álemniń 244-inshi, osy dodanyń birinshi raketkasy, frantsııalyq Selena ıAnıchıevchke ese jiberdi – 3:6, 3:6. Bul tartysty oıyn 1 saǵat 44 mınýtta aıaqtaldy.
Eske sala keteıik, budan buryn Sonıa Jıenbaevanyń Qytaıdaǵy týrnırde chempıondyq ataqqa talasatynyn jazǵan edik.
