Jibek Qulambaeva Bolgarııadaǵy týrnırde qarsylasyn kambekpen utty
ASTANA. KAZINFORM — Qazaqstan quramasynyń múshesi, álemniń 479-raketkasy Jibek Qulambaeva Haskovo (Bolgarııa) ITF W50 týrnırin jeńispen bastady.
Qazaqstandyq tennısshi alǵashqy aınalymda álemniń 399-ynshy, osy jarystyń 6-raketkasy, fınlıandııalyq Laýra Hıetarantaǵa tap keldi.
Birinshi partııa 6:4 esebimen fınlıandııalyq tennısshiniń esebine jazyldy. Degenmen Jibek 2 saǵat 58 mınýtqa sozylǵan tartysty básekede kambek jasaı bildi – 6:2, 6:1.
Jibek Qulambaeva shırek fınalǵa shyǵý úshin reıtıngide 821-oryndaǵy reseılik Valerııa Artemevamen talasady.
J.Qulambaeva sonymen qatar ýkraınalyq Valerııa Strahovamen birge juptyq synda da óner kórsetedi. Olar erteń bolgarııalyqtar Lıdııa Encheva – Denıslava Glýshkovamen oınaıdy.
Qazaqstannyń juptyq syndaǵy birinshi, álemniń 6-raketkasy Anna Danılınanyń Berlın (Germanııa) WTA 500 týrnırinde sátsizdikke ushyrady.
Serbııalyq Aleksandra Krýnıchpen birge birinshi raketka bolyp tirkelgen qazaqstandyq tennısshi alǵashqy aınalymda amerıkalyq Eıja Mýhammad – majarstandyq Fannı Stollarǵa ese jiberdi – 6:3, 6:7 (6:8), 6:10.
Qazaqstannyń erler arasynda birinshi, álemniń 11-raketkasy Aleksandr Býblıktiń Galle ATR 500 dodasyndaǵy bastapqy matchy sensatsııamen aıaqtaldy. Ol reıtıngide 74-satydaǵy ıtalııalyq Mattıa Belýchchıge jol berdi – 6:7 (6:8), 1:6.
Osylaısha, qazaqstandyq tennısshi ótken jylǵy chempıondyq ataǵyn qorǵaı almady ári 400 reıtıngilik upaıynan aıyryldy.
Eske sala keteıik, budan buryn Leıver kýbogynda Aleksandr Býblıktiń alǵash ret álem komandasynda óner kórsetetinin jazǵan edik.
