Jibek Qulambaeva Argentınadaǵy jarysta negizgi kezeńge joldama aldy
ASTANA. KAZINFORM — Qazaqstandyq tennısshi, álemniń 378-raketkasy Jibek Qulambaeva Býenos-Aıres (Argentına) WTA 125 týrnıriniń irikteý saıysyn sátti aıaqtady.
Qazaqstandyq sportshy irikteý saıysynyń fınalynda argentınalyq Gýadelýpe Rondınonıdi buıym qurly kórmedi.
Eki set te aıqyn basymdylyqpen aıaqtaldy – 6:1, 6:0.
Nebári 45 mınýtqa sozylǵan básekede Jibek eıs jasamaǵanymen, 7 breık-poınttyń altaýyn óz esebine jazdy.
Osylaısha, negizgi jarysqa joldama alǵan Jibek Qulambaevanyń kelesi qarsylasy keıin anyqtalady.
Buǵan deıin J.Qulambaeva juptyq synda slovenııalyq Veronıka Erıavetspen birge Kolýmbııanyń Sopo jáne Chılıdiń Kolına qalasynda WTA 125 dodalarynda úzdik shyqqan edi.
Eske sala keteıik, budan buryn Jibek Qulambaevanyń Chılıdegi jarysta top jarǵanyn jazǵan edik.
Sondaı-aq Dmıtrıı Popko Túrkııadaǵy týrnırdiń chempıony atandy.