Jibek Qulambaeva Antalııa jarysyna joldama aldy

ASTANA. KAZINFORM — Qazaqstandyq, álemniń 312-raketkasy Jibek Qulambaeva Antalııa (Túrkııa) chellendjer týrnıriniń irikteý kezeńin sátti ótkizdi.

Qazaqstandyq sportshy irikteý saıysynyń jartylaı fınalynda reıtıngide 346-oryndaǵy reseılik Alevtına Ibragımovany 6:1, 7:5 esebimen tize búktirdi.

J.Qulambaeva irikteý dodasynyń fınalynda qytaılyq, álemniń 278-raketkasy Chjen Výshýanmen sheberlik baıqasty. 

Birinshi partııada taı-breıkte qytaılyq tennısshi sátti oınady – 7:6 (7:4). 

Ekinshi sette 6:5 esebimen Jibek alda turǵan mezette Ch.Výshýan matchty jalǵastyrýdan bas tartty. 

Eki saǵat 18 mınýtqa sozylǵan báseke barysynda Qulambaeva eıs jasamaǵanymen, 7 breık-poınttyń beseýin paıdaǵa asyrdy. Výshýan da 5 breıkpen (11 breık-poınt) kózge tústi. 
Osylaısha, Jibek Qulambaeva negizgi jarysqa joldama aldy.

Budan buryn Antalııada dál osyndaı eki týrnırde J.Qulambaeva alǵashqy aınalymda slovenııalyq Zıva Falknerge ese jibergen edi.

Eske sala keteıik, budan buryn Elena Rybakınanyń álemdik reıtıngide 10-orynǵa túsip qalǵanyn jazǵan edik.

Sondaı-aq Dmıtrıı Popko Meksıkadaǵy jeńisinen keıin reıtıngide 175-orynǵa kóterildi.