Jazyqsyz túrmede otyrǵan jigit aqtalyp shyqty
Bolat Kalıanbekovtyń jazýynsha, 2015 jyly Dastan Myrzaqulov páterdi tonaý jáne adamdar tobymen aldyn ala sóz baılasyp urlyq jasaý qylmysy boıynsha kináli dep tanylyp, múlki tárkilenip, úsh jarym jylǵa bas bostandyǵynan aıyrylǵan. Alaıda kassatsııalyq sot Myrzaqulovty áreketterinde qylmystyq quramnyń bolmaýyna baılanysty aqtap alǵan.
«Kassatsııa kelesi negizderge súıenip otyr. Naqtyraq aıtqanda, sotqa deıingi tergeý amaldary barysynda Myzaqulovqa psıhıkalyq jáne fızıkalyq turǵyda qysym kórsetilgen. Ekinshiden, tergeý organdarynyń materıaldary men aıyptaý qujatynda, sot úkiminde kýágerlerdiń, jábirlenýshi men sottalýshynyń jaýaptaryna kelgende aıtarlyqtaı aıyrmashylyq bary anyqtalǵan. Osylaısha, Myrzaqulovtyń isti moıyndaǵany týraly jaýabynda qylmys 2015 jyldyń 17 naýryzynda úıdiń ekinshi qabatynda bolǵany jazylady. Onyń aıtýynsha, altyn buıymdar men aqshany bir qoraptan alyp ketken. Al oqıǵa ornyn tekserý kezindegi hattama men urlyqtyń bolǵany týraly aryzda qylmystyń 2015 jyldyń 16 naýryzynda 8 qabatta tirkelgeni jazylady. Oǵan qosa jábirlenýshiniń túsiniktemesine sáıkes qundy zattar men aqsha ártúrli tústegi ártúrli sómkelerde bolǵan», - delingen habarlamada.
Myrzaqulovtyń jaýabyna sáıkes ol aqshany teńge kúıinde urlaǵan. Al jábirlenýshi tarap qarajattyń AQSh dollary kúıinde urlaǵanyn jazyp bergen.
«Urlyq jasalǵan jerden 11 adamnyń saýsaq izderi anyqtalǵan. Olardyń bári de sottalýshynyń saýsaq izderimen sáıkes kelmegen. Sonymen qatar, sottalýshyǵa quqyǵy men mindettemeleri týraly túsinikteme jumystary júrgizilmegen. Aıyptaý tek sot óndirisiniń tilin bilmegen bir adamnyń ǵana jaýabyna súıene salǵan. Eń qyzyǵy, kúdiktini taný protsesi barysynda álgi kýágerge tek bir adam ǵana kórsetilgen», - dep jazady Kalıanbekov óziniń Feısbýk paraqshasynda.
Myrzaqulov qylmystyq isti júrgizip otyrǵan organdardyń zańsyz áreketinen ózine keltirilgen zalaldy óndirýge quqyly.
