Jazyqsyz tergeýge ilikken aqtóbelik Qarjy mınıstrliginen 1 mln teńge óndirip aldy

AQTÓBE. QazAqparat - Aqtóbelik turǵynǵa psıhotroptyq zattardy satý maqsatynda elektrondy resýrstardy paıdalandy degen aıyp taǵylyp, keıin dálel bolmaǵan soń prokýratýra isti toqtatýǵa ótinish túsirgen. Qylmystyq is toqtatylǵannan keıin P. Qarjy mınıstrliginen shyǵyndy óteýdi surady. Sot aryzdy qanaǵattandyrdy, dep habarlaıdy QazAqparat tilshisi.

Aqtóbe qalalyq soty azamat P-nyń Qarjy mınıstrligine bergen moraldyq jáne múliktik zııandy óteý týraly talap aryzy boıynsha azamattyq isti qarady.

Іs materıalyna súıensek, tergeý organdary P-ǵa birneshe adam aldyn ala sóz baılasyp, elektrondy aqparattyq resýrstardy paıdalaný arqyly asa iri mólsherdegi psıhotroptyq zattardy ótkizý úshin zańsyz ıemdenip, saqtady degen aıyp taqty.

P-nyń is-áreketinde qylmystyq quqyq buzýshylyq quramynyń bolmaýyna baılanysty prokýror taǵylǵan aıyptan bas tartyp, qylmystyq is sottyń qaýlysymen toqtatyldy.

«Tergeý kezinde talap qoıýshy birneshe aı qamaýda bolǵandyqtan, keltirilgen moraldyq jáne materıaldyq zalaldy óteýdi surady. Moraldyq azaptyń mólsherin, talap qoıýshynyń densaýlyq, bostandyq, ar-namys jáne qadir-qasıet, júrip-turý bostandyǵy sııaqty ómirlik mańyzdylyǵy bar quqyqtaryn eskere otyryp, sot P. paıdasyna 300 000 teńge moraldyq zııan, 600 000 teńge múliktik zııan, 150 000 teńge ókil kómegine ketken sot shyǵyndaryn óndirdi. Sot sheshimi zańdy kúshine engen joq»,- dep habarlady Aqtóbe qalalyq sotynyń baspasóz qyzmeti.