Jazýshylar odaǵynyń Túrkistan oblystyq fılıalyna tóraǵa saılandy
Túrkistanda aqyn-jazýshylardyń «Túrkistan – Táýelsizdik tuǵyrynda» atty kezdesýi ótti. Rýhanı mańyzy bar basqosýǵa Qazaqstan Jazýshylar odaǵy basqarmasynyń tóraǵasy, aqyn Ulyqbek Esdáýlet, tóraǵa orynbasarlary – jazýshy Mereke Qulkenov, aqyn Aqberen Elgezek jáne Qazaqstan Jazýshylar odaǵy basqarmasynyń hatshysy, aqyn Qasymhan Begmanov bastaǵan respýblıkanyń jáne Túrkistan oblysynyń qalamgerleri qatysty. Jıyndy Túrkistan oblysy ákiminiń orynbasary Sáken Qalqamanov júrgizip otyrdy.
Táýelsizdik merekesiniń 30 jyldyǵyn Túrkistan óńiri tolaıym tabystarmen, oń ózgeristermen qarsy alyp otyrǵanyn aıtqan ol, shahardy damytýda aqyn-jazýshylarǵa da artylar júk az emes ekenin jetkizdi. Oblys ákimi Ómirzaq Shókeevtiń atynan jazýshy Mereke Qulkenovtiń 70 jyldyǵyna arnalǵan quttyqtaý hat men syı-sııapatyn tapsyrdy. Sonymen birge Jazýshylar odaǵynyń tóraǵasynyń ıyǵyna da shapan jabyldy.
Qazaqstan Jazýshylar odaǵy basqarmasynyń tóraǵasy, aqyn Ulyqbek Esdáýlet odaqtyń tynys-tirshiligi men josparlary týraly aıtyp berdi. Jańa tynysy ashylǵan Túrkistannyń ádebıeti de óz bıiginen túspeı, óńirmen birge órkendeýi tıis ekenin jetkizdi. Jıynda Túrkistan óńiriniń 13 qalamgerine Qazaqsan Jazýshylar odaǵynyń músheligine qabyldanǵany jónindegi kýálikteri tapsyryldy. Olardyń arasynda jalyndy jastar da, orta býyn ókilderi de bar. Sonymen birge oblys aqyn-jazýshylary men Jazýshylar odaǵy basshylyǵynyń qoldaýymen Aıdar Seıdázim Qazaqstan Jazýshylar odaǵy Túrkistan oblystyq fılıalynyń tóraǵasy bolyp saılanyp, buıryǵy jurtshylyqqa tanystyryldy.
Qalamgerlerdiń keleli keńesinde ádebıetke qoldaý kórsetý, óńirdiń rýhanı áleýetin kóterý, jas aqyn-jazýshylardyń sheberligin shyńdaý baǵytynda usynystar men pikirler aıtyldy. Oblystyq fılıaldyń jańa tóraǵasyna sáttilik tilep, ádebıetti qoldaý baǵytynda tyń bastamalardy qolǵa alyp, qaıratkerlik tanytaryna senim bildirdi. Aqyn Murat Bekeı, jazýshy, ádebıet zertteýshisi Qulbek Ergóbek, aqyn Nurmahan Nazarov jáne ózge de qalamgerler usynys-pikirlerin ortaǵa saldy.
Rýhanı basqosýdy túıindegen Sáken Qalqamanov jıyndaǵy bastamalar eskerýsiz qalmaıtynyn jetkizdi.
«Túrkistan qalasynda túrli mádenı nysandar boı kóterip, basym kópshiligi paıdalanýǵa berildi. Endi osy mádenı nysandarda túrli ádebı is-sharalar, aqyn-jazýshylardyń keshteri, jańa týyndylardyń tusaýkeserleri ótip turady. Aldaǵy ýaqytta Qazaqstan Jazýshylar odaǵymen birlese otyryp, Túrkistan óńiriniń rýhanııatyna oń ózgerister alyp keletin mańyzdy jumystardy birge atqaratyn bolamyz», - dedi ol.
