Jazýshy Medeý Sársekeniń E. Bekmahanov jaıyndaǵy eńbegi jaryq kórdi
ALMATY. 18 aqpan. QazAqparat /Erbol Turymbetov/ - Búgin Ál-Farabı atyndaǵy QazUÝ-diń tarıh fakýltetinde Medeý Sársekeniń dańqty adamdar ómiri toptamasy boıynsha Máskeýden shyqqan «Bekmahanov» atty kitabynyń tusaýkeseri ótti.
Qundy eńbek ótken jyldyń jeltoqsan aıynda basylyp shyqqan. Onda qazaq halqynyń birtýar ǵalymy Ermahan Bekmahanovtyń ómiri men ǵylymı-shyǵarmashylyq ǵumyry baıandalǵan.
QazUÝ rektory Ǵalymqaıyr Mutanov ýnıversıtet kitaphanasyna búginde eńbektiń 100 danasynyń kelip túskenin atap ótti. «Týǵan halqynyń naǵyz patrıoty bolǵan uly ǵalymnyń júrip ótken ómir joly keıingi urpaqqa qashan da úlgi. Keńes Odaǵy tusynda óziniń Kenesary Qasymuly týraly zertteý eńbegi úshin qanshama qýdalandy. Osyndaı tarıhı tulǵamyzdy qaıta túletip, halqymen qaýyshtyryp otyrǵan Medeý aǵamyzǵa úlken alǵasymyzdy bildiremiz», - dedi rektor.
Kitap avtory Medeý Sársekeniń qolynan buǵan deıin halqymyzdyń uly tulǵalary Q. Sátbaev pen E. Bóketov jaıyndaǵy eńbekter dúnıege kelgen. «Bul kitaptyń alǵashqy tusaýkeserin E. Bekmahanovtyń óziniń eńbek etken oqý ordasynda ótkizýdi jón sanadym. Kitap shyǵysymen respýblıkalyq «Egemen Qazaqstan» jáne «Kazahstanskaıa pravda» gazetterinde suhbattar jarııalanyp úlgerdi», dedi M. Sárseke. Onyń sózine qaraǵanda, kitaptyń tanystyrylymy endi 22 aqpanda Pavlodarda jáne basqa óńirlerde ótkeli otyr.
