Jazýshy, qoǵam qaıratkeri Myrzageldi Kemel ómirden ozdy

Myrzageldi Kemeldiń qaıtys bolǵanyn Mádenıet jáne sport mınıstrliginiń baspasóz qyzmeti rastady.

Myrzageldi Kemel 1949 jyly 15 qańtarda Ońtústik Qazaqstan oblysy, Maqtaral aýdanynda týǵan. 1971 jyly Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýtynyń aýyl sharýashylyǵyn elektrlendirý mamandyǵyn, 2000 jyly M.H.Dýlatı atyndaǵy Jambyl ýnıversıtetiniń quqyqtaný fakýltetiniń zańger mamandyǵyn tamamdaǵan.

Eńbek jolyn 1971 jyly Maqtaral aýdanyndaǵy «Oktıabrdiń 30 jyldyǵy» sovhozynda aǵa ınjener bolyp bastaǵan. 1975–1992 jj. Maqtaral aýdanynda partııa, keńes qyzmetinde boldy. 1992–1994 jj. keńshar dırektory, 1994–1995 jj. Qazaqstan Respýblıkasy Joǵarǵy Keńesiniń depýtaty, 1995 jyly Qazaqstan Respýblıkasy Mınıstrler Kabıneti janyndaǵy shetel ınvestıtsııasy jónindegi komıtetiniń sektor meńgerýshisi bolyp qyzmet atqarǵan. 1995–2004 jj. birinshi, ekinshi shaqyrylǵan Qazaqstan Respýblıkasy Parlamentiniń depýtaty.

Rýhanııat salasynda 10 kitap shyǵarǵan, olardyń ishinde ózi jazǵan izgilikke, ımandylyqqa, bilim-bilikke, aqyl-parasatqa úndeıtin tanymdyq-kósemsózdik eńbekterge qosa, qytaı aqylmandary Lao Tszy men Konfýtsııdi, ıspan pálsapashysy Baltasar Grasıan, ejelgi úrim jáne grek aqylmandarynyń aforızmderin, qazirgi ilimderdi nasıhattaýshy Lýıza Heı, búgingi kúnniń eń ataqty jazýshylarynyń biri Paýlo Koelolardyń tańdaýly eńbekterin qazaq tiline tárjimalaǵan. «Dúnıe» jáne «Ekologııa ı ýstoıchıvoe razvıtıe» jýrnaldaryn shyǵardy. «Abzaldyq álippesi», «Ózime sabaq» sııaqty kitaptary oqyrman qaýymnan joǵary baǵasyn alǵan. 2004 jyly ekonomıka ǵylymynyń doktory ǵylymı ataǵyn alǵan. Qazaqstan Respýblıkasynyń Prezıdenti janyndaǵy Memlekettik basqarý akademııasynyń professory, 14 monografııanyń, 100-ge jýyq ǵylymı maqalalardyń avtory.