Jazýshy Kádirbek Segizbaev: Qazaq ádebıetiniń órisi keńeıe bastady

«Búgingi tańda Táýelsizdik zamanynda qazaq jazýshylarynyń týyndylary aǵylshyn tiline aýdaryla bastady. Osy eńbekti qolǵa alǵan, Eýropaǵa «altyn kópir» salyp jatqan Halyqaralyq Qazaq Pen klýbyna alǵys aıtqymyz keledi»,- deıdi jazýshy.

Kádirbek Segizbaevtyń aıtýynsha, jazýshylar men aqyndardyń taǵy birneshe kitaptary Túrkııada da basylyp shyqqan.

«Osynyń bári - qazaq ádebıetiniń órisiniń keńeıe bastaǵanyn kórsetedi. Jalpy, meniń oıymsha, qazaq ádebıeti eshkimnen kem-qor emes, kende emes. Keńes Ókimeti kezinde ár respýblıkadan bir-bir myqtylardy sanaly túrde shyǵarǵan. Oralhandar da sol tusta keń túrde Shyńǵys Aıtmatovtardaı nasıhattalatyn bolsa, bálkim úlken-úlken báıgelerdiń aldyn ozyp keler me edi dep oılaımyn. Prozanyń ózinde keshegi ótken Ábishter, Oralhandar qaı-qaısysy bolsyn, keremet prozaıkter. Biraq, onyń nasıhaty men dáriptelýi jetpeı jatyr»,- deıdi ol.

Jazýshy sonymen birge, jýyqta ǵana kóz jumǵan Raqymjan Otarbaevty eske aldy.

«Bizdiń ortamyzda keshegi ótken Raqymjan Otarbaevtar... Ol álemdegi eshbir prozaıkten kem emes. Álibek (Asqarov - avt.) degen inimizdiń óziniń de aıaq alysy bólek. Eýropanyń, japonnyń jazýshylarynan kem dep aıta almaımyn. Tek nasıhatymyz jetpeı jatyr. Sondyqtan, Bıgeldi myrzanyń isin jalǵastyratyn azamattar kóp bolyp, qazaq tilindegi kitaptar shet tilderine aýdaryla bersin degen tilek bildirgim keledi», - deıdi jazýshy.

Eske sala ketsek, búgin elordada qazaqtyń birtýar qalamgeri Oralhan Bókeıdiń aǵylshyn tilindegi «Kisi kıik» kitabynyń tusaýy kesildi. Tusaýkeserge Qazaqstannyń Eńbek sińirgen qaıratkeri Álibek Asqarov pen elimizge belgili jazýshylar Qýanyshbaı Qurmanǵalı, Kádirbek Segizbaı keldi. Sonymen birge, aıtýly sharaǵa kitapty aýdarǵan Saımon Hollıngsvort pen Saımon Gegen Londonnan arnaıy ushyp kelip, sharaǵa qatysty.