Jazýshy Gerold Belger kóz jumdy

ALMATY. QazAqparat- Búgin Almatyda kúndizgi saǵat 13:00 shamasynda Ortalyq klınıkalyq aýrýhanada 81 jasyna qaraǵan shaǵynda jazýshy, aýdarmashy, ádebıettanýshy Gerold Belger qaıtys boldy. Bul týraly QazAqparat tilshisine jazýshynyń otbasy málimdedi. Marqummen qoshtasý rásimi qashan ótetini ázirge belgisiz.

Belger Gerold Reseıdiń Saratov oblysynda 1934 jyly 28 qazanda dúnıege kelgen.

1941 jyly Stalınniń jarlyǵymen KSSR-daǵy barlyq nemistermen birge Qazaqstanǵa, qazaq aýylyna (SQO Ysqaq Ybyraev aýyly) jer aýdaryldy. Bul jerde jas Gerold qazaq tilin úırenedi.

Qazirgi Soltústik Qazaqstan oblysy Shalaqyn aýylynda qazaq orta mektebinde oqydy. Mektepti altyn medalǵa aıaqtaǵan.

Abaı atyndaǵy Qazaq pedagogıka ınstıtýtyn jáne aspırantýrasyn támamdady. Shyǵarmalaryn nemis, orys, qazaq tilderinde jazǵan. 1958-1960 jyldary - Jambyl oblysy Baıqadam keńsharynyń orta mektep muǵalimi. 1963-1964 jyldary - «Juldyz» jýrnalynyń ádebı qyzmetkeri. 1964 jyldan shyǵarmashylyq jumysta bolǵan. 1992 jyldary nemis tilinde shyǵatyn «Fenıks» almanahy bas redaktorynyń orynbasary qyzmetterin atqarǵan. «Aýyl shetindegi úı», «Daladaǵy shaǵalalar», «Alty asý», «Tas ótkel», «Baýyrlastyqtyń jandy beınesi», «Sozvýchıe», «Ýaqytpen betpe-bet», «Motıvy treh strýn», «Gete ı Abaı», «Rodstvo», «Zemnye ızbrannıkı» zertteý eńbekteriniń, jekelegen áńgime, maqalalary engen 25-ke jýyq jınaqtardyń avtory. B.Maılın, H.Esenjanov, Á.Nurpeıisov, Á.Kekilbaev, D.Dosjanov, taǵy basqa qazaq jazýshylarynyń birqatar shyǵarmalaryn qazaqshadan orys tiline, A.Raımgen, E.Konchak, N.Vakker, taǵy basqa nemis aqyn, jazýshylarynyń jekelegen týyndylaryn nemis tilinen orysshaǵa aýdardy. Qazaqstan Jazýshylar odaǵynyń B.Maılın atyndaǵy syılyqtyń, Prezıdenttiń beıbitshilik pen rýhanı tatýlyq syılyǵynyń, sondaı-aq Qazaqstan PEN-klýb syılyǵynyń ıegeri. «Parasat» ordenimen marapattalǵan.