Jazýshy Dýlat Isabekov bilim alǵan mektep 90 jyldyǵyn atap ótti
ShYMKENT. QazAqparat - Ońtústik Qazaqstan oblysy Ordabasy aýdanynda J.Jabaev atyndaǵy jalpy orta mektebi 90 jyldyq mereıtoıyn toılady, dep habarlaıdy QazAqparat.
Qazaqtyń birtýar azamattary oqyǵan bilim oshaǵynyń saltanatty jıynyna oblys ákimi Janseıit Túımebaev arnaıy qatysyp, kópshilikti atalǵan merekemen quttyqtady.
«Bul mektep 90 jylda talaı shákirtti qanattandyryp, úlken ómirge ushyryp keldi. Keńes odaǵynyń batyry Beısen Ońtaev, memleket jáne qoǵam qaıratkerleri Beken Ábdirazaqov, Dýlat Isabekov, Sadyqbek Adambekov, Qosjan Músirepov osy oqý ordasynda bilim alǵanyn biz maqtan etemiz. Alyptardy shyǵarǵan bul bilim uıasy, halqynyń qamyn jeıtin áli talaı urpaq tárbıeleıtinine bek senimdimin», - dedi J.Túımebaev.
Shara barysynda óńir basshysy men jazýshy D.Isabekov mekteptiń aldynda boı kótergen qazaq halyq poezııasynyń áıgili tulǵasy, jyraý, jyrshy J.Jabaevtyń eskertkishin saltanatty túrde ashyp berdi. Budan bólek, 3 tilde jaryq kórgen «Altyn uıa» atty kitaptyń tusaýyn kesip, ózderiniń qoltańbalaryn qaldyrdy. Sondaı-aq, oblys ákimi atalǵan bilim usynda bilim alyp, óńirimizdiń ósip órkendeýine súbeli úles qosyp júrgen birqatar azamattardy arnaıy marapattap, qurmet kórsetti.
Aıta keteıik, ǵasyrǵa jýyq tarıhy bar bilim oshaǵynda 2016 jyly oblystyq bıýdjettiń esebinen 10 mln teńge bólinip, kúrdeli jóndeý jumystary júrgizilgen. Qazirgi tańda munda 54 ulaǵatty ustaz 430-dan astam oqýshyǵa bilim berip keledi.
