Jazýshy Ánes Saraıdyń «Ult. Tarıh. Qalamger» atty shyǵarmashylyq keshi ótedi

Bul sharany Astana qalalyq Tilderdi damytý basqarmasy men Eýrazııa ulttyq ýnıversıtetiniń ujymy birlesip uıymdastyryp otyr. 

Qalamgerdiń óskeleń urpaqpen kezdesýi Ánes Tólendiulynyń 75 jasqa tolǵan mereıtoıy aıasynda ótkeli tur. Jazýshy stýdentterge óziniń shyǵarmashylyǵy týraly aıtyp beredi jáne aldaǵy josparlarymen bólispekshi.

Aıta ketý kerek, Ánes Saraı 1937 jyly 21 qarashada Reseı Federatsııasy, Astrahan oblysynyń Volodar aýdany, Kirmalaı aýlynda týǵan. Alǵashqy týyndylary respýblıkalyq baspasóz betterinde 1963 jyldan bastap jarııalanǵan.

Qazaq memlekettik ýnıversıtetiniń jýrnalıtıka fakýltetinen tálim alyp, eńbek jolyn «Lenınshil jas» gazetinde menshikti tilshi qyzmetinen bastaǵan, odan keıin osy basylymda bólim meńgerýshisi, Bas redaktordyń orynbasary qyzmetterin abyroımen atqardy.

Qazaq halqy Ánes Saraıdy tarıhı shyǵarmalardy dúnıege ákelgen daryndy jazýshy retinde aıryqsha qurmet tutady. Ásirese, «Qarasha ótken soń», «Bozqyraý», «Tosqaýyl», «Altyn aral», «Aq tymyq tún», «Asyldyń synyǵy», «Muhammed paıǵambardyń ómiri», «Isataı men Mahambet», «Adaılardyń arǵy tarıhy», «Noǵaıly», «Kónelikter» atty kitaptaryn oqyrmandar erekshe yqylaspen qabyl aldy. Sondaı-aq qazaq óneriniń órkendeýi úshin tarıhı mańyzy zor dramatýrgııalyq shyǵarmalardy tartý etti.

Qalamgerdiń shoqtyǵy bıik shyǵarmasy - «Edil-Jaıyq» romany. Jazýshy osy eńbeginde 1917-1920 jyldar arasyndaǵy Kaspıı teńizi men Atyraý óńirindegi tóńkeris oqıǵalaryna ózindik kózqaras, tyń da tosyn paıymdaýlar jasady. Qalamgerdiń eńbegi joǵary baǵalanyp, Qazaqstan Memlekettik syılyǵyna ıe boldy.