Jazýshy Ábdisattar Ospanov Qazaq Ulttyq Óner Ýnıversıtetine óziniń kitaptaryn tartý etti
«Kitap - adamnyń oıyn baıytyp, bilimin jetildiretin oqý quraly. Búgingi jastar burynǵy biz sııaqty kitapqa kóp mán bermeıdi. Biz bala kúnimizde kitapty oqyǵanda jep qoıa jazdaıtyn edik. Osy oraıda, jastarǵa halqymyzdyń zańǵar jazýshysy Ǵabıt Músirepovtiń «kitap oqýdan tyıylsaq, oı oılaýdan da tyıylar edik» degen ataly sózin aıtqym keledi», - dedi Ábdisattar Sádýaqasuly oqý ordasyna óz kitaptaryn usynyp jatyp.
Jazýshy «Narkesken» atty 3 tomdyq tarıhı-kórkem trılogııasyn oqý ordasyna tartý etti. Kitaptyń negizgi taqyryby uly ata-babalarymyzdyń tarıhyn tolyqqandy zerdelep, otan, týǵan jer úshin qasyq qanyn aıamaǵan bahadúr erlerdiń erlikterin arqaý etken.
«Qalyń oqyrmannyń nazaryna usynyp otyrǵan bul kitabym - tarıhymyzdy dáripteıtin, elin áspetteıtin qaýym úshin talǵamy bıik shyǵarma. Bul kitap - búgingi jastardyń patrıottyq rýhyn kóterýde mańyzdy rol atqaratynyna esh shúbá keltirmeımin», - dep atap ótti avtor.
Jazýshynyń aıtýynsha, «Narkesken» 3 tomdyq trılogııasyn byltyr Janqoja Nurmuhamedulynyń 240 jyldyq mereıtoıy qarsańynda jazyp bitirgen. «57 jyl ǵumyrymdy osy kitapqa arnadym. Janqoja batyrdyń bala kezinen bastap, 86 jasynda qaıtys bolǵanǵa deıingi ǵumyry qamtylǵan. Munda batyr týraly el aýzyndaǵy áńgimelerdiń muraǵat qujattarymen sáıkes keletinderi ǵana kirdi. Kezinde Muhamedjan Tynyshbaev: «Janqoja batyr - qazaqta kózi tirisinde úsh júzdiń bıi, ári áýlıesi atanǵan adam», dep jazypty. Osyndaı derekter bar»,- dedi Ábdisattar Ospanov. Avtory: Kúnsultan Otarbaı
