Jazýshy Ǵalymbek Elýbaıuly ómirden ótti

Talantty jas jazýshy Ǵalymbek Elýbaıuly 39 jasynda ómirden ótti, dep habarlaıdy Kazinform. 

Onyń Alash murasyn jınaqtaýda sińirgen eńbegi zor. 2011-2016 jyldary Shymkent qalasyndaǵy saıası qýǵyn-súrgin qurbandary mýzeıinde qyzmet ete júrip, Alash qaıratkerleriniń qundy eńbegi jarııalanǵan «Aq jol» gazetin transkrıptsııa jasap, 25 tomdyq kitaptyń shyǵýyna sebepker boldy.

Jazýshy «Shala baýyzdalǵan aq eshki», «Týmaı turyp ólimge kesilgender», «Búıi qaptaǵan jaz», «Quralaı tyshqannyń boǵy» sekildi áńgimelerimen tanyldy. Onyń 2023 jyly «Júz jetinshi kóktem» kitaby jaryq kórgen bolatyn.

Ǵalymbek Elýbaıuly 1984 jyly 9 qańtarda Qytaıdyń Altaı aımaǵy, Kóktoǵaı aýdanynda dúnıege kelgen.