Jazǵy jáne qysqy Azııa oıyndarynda batysqazaqstandyq sportshylar da namysty qoldan bermeýge tyrysady– Q.Jetpisov

Qurlyqtaǵy qos birdeı básekede el namysyn basqalarmen qatar batysqazaqstandyq sportshylar da qorǵamaıtyn bolady. Dúbirli dodaǵa baratyn sportshylardyń túgelge jýyǵy Batys Qazaqstan oblystyq olımpıada rezervterin daıarlaý ortalyǵy qanatynyń astyna shoǵyrlanǵan. QazAqparat tilshisi jaýapty jarystar qarsańynda ortalyq dırektory, áıgili balýan, sambodan álem chempıony, álem kýbogynyń ıegeri, QR eńbek sińirgen sport sheberi Qonys Jetpisovpen suhbattasqan edi.

- Qonys Satybaldyuly, Siz basshylyq etetin ortalyqtyń maqsaty qandaı? Munda qansha sport túrlerin qamtylǵan, qansha sportshyǵa qamqorlyq jasalýda?

- «Olımpıada rezervterin daıarlaý ortalyǵy» MKQK 2001 jyly quryldy. Maqsaty - sport mektepterin bitirgen, sporttyq sheberlikteri shyńdalyp, joǵary nátıjelerge jete bastaǵan qyz-jigitterdi bir jerge jınaqtaý, túrli jarystarǵa qatysýlaryna jaǵdaı týǵyzý. Bylaısha aıtqanda, sport mektepteri men kásibı sporttyń arasyna altyn kópir bolý. Qazir ortalyqta sporttyń on túri, atap aıtqanda akademııalyq esý, boks, grek-rım kúresi, erkin kúres, dzıýdo, jeńil atletıka, sadaq atý, sambo jáne short-trek qamtylǵan. Kúni búgin bizde 84 sportshy tirkeýde tur. Olardy jarystarǵa, oqý-jattyǵý jıyndaryna jiberý, basqa da túrli jaǵdaılaryna baılanysty kómektesý bizdiń mindetimizge jatady.

Sportshylar jetistigine toqtalsaq, barlyǵyn tizbeleýdiń qajeti bola qoımas. Tek jyl basynan bergilerine toqtalsaq, akademııalyq esýden jerlesimiz Grıgorıı Feklıstov Temirtaýda ótken Qazaqstan chempıonatyn utty. Tatıana Feklıstova, Artem Bekmachev, Ramıl Shamsýtdınov, Anarbek Ómirov sekildi qyz-jigitter osy jarysta júldeli ekinshi-úshinshi oryndarǵa ıe boldy. Bokstan Erjan Kárimov pen Erik Áljanov Sıdneıde ótken olımpıada oıyndarynyń chempıony E. Ibraıymovtyń týrnırinde top jarsa, Aslan Esenov qola júldeger atandy. Grek-rım kúresinen Taılandtyń astanasy Bangkokta ótken Azııa chempıonatynda altyn medal alyp qaıtqan Aıbek Mardanov - bolashaǵynan úlken úmit kúttiretin jas balýandarymyzdyń biri.

Dzıýdoshy qyzdardan jastar arasyndaǵy el chempıony Ásel Qazıevany, M. Mámetova týrnırinde top jarǵan Almagúl Orynǵalıevany, jasóspirimder arasynan ekinshi Eýrazııalyq sport oıyndarynda chempıon bolǵan Gúldana Álmuhanbetovany erekshe ataýǵa bolady. Olardan bólek Aıjarqyn Eslıamova, Alena Gorbýnova, Aıda Sadyqova sekildi balýan qyzdarymyz da jıi júldege iligýde. Dzıýdoshy qos jigit Azamat Muqanov pen Qazbek Supyǵalıev óz salmaqtarynda Qazaqstanda aldyńǵy orynda.

Erkin kúresten Ekaterına Larıonovanyń keleshegi kemel bolady dep senemiz. Sebebi ol Pavlodarda ótken kadetter arasyndaǵy Qazaqstan chempıonatynda 60 kıláda kúresip, jeńimpaz atandy. Artynsha osy jetistigin Ekibastuzda qaıtalady. Shildede Taı elinde bolǵan Azııa chempıonatynda altynnan alqa taǵyp, el mereıin asyrdy. Tájirıbeli balýandarǵa keletin bolsaq, Gýzel Manıýrova Úndistandaǵy Azııa chempıonatynda qarsylas shydatpaı, jeńis tuǵyrynyń eń bıik satysyna kóterilse, Olga Jánibekova osy saıysta kúmis medalǵa qol jetkizdi. Máskeýdegi álem chempıonatynda qola júldeni qorjynǵa salǵan erkin kúres sheberi Abdýlhakım Shápıevti el biledi.

Sadaq atýdan Anastasııa Bannova bastaǵan áıelder quramasy Qazaqstanda birinshi orynda. Sambodan Aq Jaıyq sportshylarynyń jeńisti joly álemge aıan. Álem chempıony, álem kýbogynyń ıegeri Erbolat Baıbatyrov, álem kýbogy kezeńiniń jeńimpazdary Medet Ońdaǵanov pen Baǵdat Jarylǵasov - bizdiń maqtanyshtarymyz.

Qysqy sport túrlerinen shańǵydan Elena Antonova men Alla Golovotenkoǵa, short trekten Aıdar Bekjanov, Artýr Sultanǵalıev bastaǵan basqa da qyz-jigitterge úlken senim artamyz.

-Sportshylarǵa qamqorlyq oıdaǵydaı, qarjy jetkilikti, qandaı jarysqa baram dese de jol ashyq dep júrmiz. Basshy retinde Sizdi tolǵandyratyn másele bar ma?

- Árıne, bar. Búgin tańda, ókinishke qaraı, jastardyń sportqa qulshynysy tómendep ketti. Kóp nárseni kompıýter, teledıdar almastyrdy. Jattyqtyrýshylarda baıaǵydaǵydaı balany eliktirip, baýrap áketý jaǵy kemshin. Bir ǵana mysal, maqtaǵanym emes, bizdiń bapkerimiz bolǵan Músilim Ońdaǵanovtyń kezinde arnaıy bilimi joq edi. Bilimi bolmasa da ózi tań atysy, kesh batysy zaldan shyqpaı, myqty sportshylardy úlgi etip, solardy kórsek degen bizdiń armanymyzdy oıatty, jigerimizdi janydy. Qazirgi bapkerler balany birtindep qyzyqtyra túsýdiń ornyna oryndalmaıtyn tapsyrmalar berip, úrkitip alady. Mysaly, ózim aınalysqan sambo kúresinde eńbek sińirgen sport sheberi bolsam da, ázer jasaıtyn ádis-tásilder jetkilikti. Kúres álippesin jańa ashqan baldyrǵannan solardy talap etse, qalaı bolaryn ózińiz oılaı berińiz. Ekinshi bir úlken másele - aýyl túgili, qalada sport zaldary az. Bolashaqta qalanyń ár jerinde shaǵyn-shaǵyn birneshe sport zaldary salynsa, jastardyń sportqa kóptep keleri anyq. Árıne, jalpy jaǵdaı jaman emes, jaǵdaı jasalsa, jaqsy nátıje ýaqyttyń enshisinde ekeni belgili ǵoı.