Jazǵy ýnıversıada oıyndary: Qazaqstan eki orynǵa tómen syrǵydy
ASTANA. QazAqparat - Qytaıdyń Taıbeı qalasynda ótip jatqan Jazǵy ýnıversıada oıyndarynda qazaqstandyq jeńil atlet Sergeı Grıgorev kúmis júldege ıe bolǵanyna qaramastan, elimiz medaldardyń jalpy esebinde eki orynǵa tómen syrǵydy, dep habarlaıdy QazAqparat Sports.kz saıtyna silteme jasap.
Jeti kún boıǵy jarystardan keıin Qazaqstan 14-inshi orynda bolǵan edi, biraq kelesi kúni 16-orynǵa tómen tústi. Elimiz qorjynynda 14 medal bar, onyń 3 - altyn, 5 - kúmis jáne 6 - qola.
Jeksenbi kúngi jarystardyń nátıjesi boıynsha, Japonııa kósh bastady - 78 medal (30-20-28). Ońtústik Koreıa tıisinshe ekinshi orynǵa syrǵydy - 71 medal (27-18-26). Qytaılyq Taıbeı burynǵysha úshinshi orynda - 63 medal (17-26-20).
