Jazǵy ýnıversıada: Qazaqstan medaldar kestesinde 10-orynǵa kóterildi

ASTANA. QazAqparat – Qytaıdyń Chendý qalasynda ótip jatqan HHHІ Jazǵy ýnıversıadanyń úshinshi jarys kúni aıaqtaldy. Medaldar kestesinde Qazaqstan 10-orynǵa kóterildi, dep habarlaıdy QazAqparat tilshisi.

Qazir el quramasy enshisinde 11 medal bar. Onyń biri – altyn, beseýi – kúmis, beseýi – qola.

Medaldar kestesinde qazaqstandyq sportshylar 14-orynnan 10-orynǵa kóterildi. Kósh basynda 28 (17-6-5) medalmen Qytaı keledi. Odan keıingi oryndardaǵy Ońtústik Koreıanyń – 28 (13-10-5) Japonııanyń 25 (11-7-7) medali bar.

Jazǵy ýnıversıadanyń úshinshi jarys kúni, 31 shildede Qazaqstan 6 medal aldy.

Atap aıtqanda, taekvondoshy Rıta Bakısheva (48 keli) dúnıejúzilik dodanyń jeńis tuǵyryna kóterildi.

Al Dıana Tursynbek (sadaq atý) ekinshi orynnan kórindi.

Kórkem gımnastıkadan Eljan Tanıeva eki kúmis (dop pen lentamen óner kórsetý), bir qola (qursaýmen saıys) aldy.

El quramasynan vıntovkamen 10 metr qashyqtyqta oq atý saıysynda Konstantın Malınovskıı, Islam Sátpaev jáne Nıkıta Shahtorın qola júlde ıelendi.