Jazǵy demalysta elordalyq balalar qandaı lagerlerge bara alady
NUR-SULTAN. QazAqparat – Nur-Sultan qalasynyń bilim basqarmasynyń basshysy Sholpan Qadyrova jazǵy demalysta balalar qala syrtyndaǵy qandaı lagerlerge baryp, demala alatynyn aıtyp berdi, dep habarlaıdy QazAqparat tilshisi.
«Bilim alýshylar jazǵy demalysqa shyqqannan keıin ata-analardyń kóbin mazalaıtyn suraqtardyń deni - lagerlerdiń jumysy men jalpy demalystyń uıymdastyrylýyna qatysty bolyp keledi. Bıyl balalarǵa arnalǵan jazǵy demalys qala syrtyndaǵy lagerlerde uıymdastyrylady. Olar: «ARMAN» týrıstik-saýyqtyrý kesheni (900 bala), «Borovıchok» saýyqtyrý lageri (750 bala), «Batyr» shatyrly lageri (280 bala), «Tulpar» kıiz úı lageri (300 balaǵa arnalǵan). Jazǵy demalyspen jetim balalar, ata-anasynyń qamqorlyǵynsyz qalǵan balalar, táýekel tobyndaǵy jáne devıantty minez-qulyqty balalar qamtylady», - dedi Sholpan Qadyrova Nur-Sultan qalasy ákimdiginiń Facebook paraqshasynda onlaın rejımde ótken baspasóz máslıhatynda.
Sonymen qatar, Oqýshylar saraılarynyń janynda jazǵy demalys akademııasynyń jumysy uıymdastyrylady.
«Halyqaralyq balalardy qorǵaý kúni bıyl «Barlyǵy balalar úshin» uranymen ótedi. Josparlanǵan is-sharalar #NS_balalarkuni_bilim heshtegi boıynsha uıymdastyrylady. Sol kúni Instagram áleýmettik jelisinde balalar psıhologynyń, ishki ister organdarynyń ókili, zańgerlerdiń, bilim berý jáne ǵylymı óndiristik birlestik ókilderiniń qatysýymen tikeleı efır uıymdastyrylady. Onda ata-analar men balalar quqyqtyq jáne ózge de keńester ala alady. «Ashyq sport» mektep alańy uıymdastyrylady. Onda júzik atý, bestas, asyq atý, toǵyzqumalaq, kir tasyn kóterý, Qazaq kúresinen jarystar men sheberlik sabaqtary uıymdastyrylady. Balalar eko-asarǵa qatysady. Ómirdiń qıyn jaǵdaıyna tap bolǵan balalardy qoldaý ortalyǵynyń jáne «Astana SOS Balalar aýyly» tárbıelenýshileri úshin merekelik quttyqtaý baǵdarlamasy ótkiziledi», - dedi basqarma basshysy.
